اسلام آباد: فیڈرل بورڈ آف ریونیو نے ایک ہزار سے زائد ہونڈا سٹی کاریں خریدنے کا فیصلہ کرلیا۔

ایف بی آر نے ہونڈا اٹلس کارز کو 1010 گاڑیاں خریدنے کے لئے لیٹر آف انٹینٹ لکھ دیا ہے جب کہ نئی خریدی جانے والی 1010 گاڑیوں کی تخمینہ لاگت 6 ارب روپے سے زائد ہوگی۔

ترجمان ایف بی آر کے مطابق گاڑیوں کی خریداری 2 مراحل میں کی جائے گی جس کے لیے ایف بی آر مکمل رقم ادا کرے گا جب کہ 1010 گاڑیوں کی خریداری کے لئے 3 ارب کی پیشگی ادائیگی کی جائے گی۔

ایف بی آر کا کہنا ہے کہ 3 ارب 500 گاڑیوں کی مکمل ادائیگی کے طور پر تصور کیے جائیں گے، 500 گاڑیوں کی پہلی کھیپ کی ترسیل کے بعد بقیہ ادائیگی کی جائے گی جب کہ 1010 گاڑیوں کی ڈیلوری جنوری سے مئی کے دوران کی جائے گی۔

ترجمان ایف بی آر نے بتایا کہ پہلے فیز میں جنوری میں 75، فروری میں 200 گاڑیاں ڈیلیور کی جائیں گی، پہلے فیز میں مارچ میں 225 ہونڈا سٹی کاروں کی ڈیلوری کی جائے گی جب کہ دوسرے فیز میں اپریل میں 250، مئی میں 260 گاڑیاں ڈیلیور کی جائیں گی۔

ایف بی آر نے مزید بتایا کہ گاڑیوں کی خریداری ایف بی آر کے ٹرانسفارمیشن پلان کا حصہ ہے، گاڑیاں فیلڈ افسران کی استعداد کار بہتر بنانے کے لیے خریدی جارہی ہیں جب کہ یہ گاڑیاں صرف فیلڈ افسران کے لیے ہی ہوں گی۔