نئے انسپکٹر جنرل آف پولیس (آئی جی پی) خیبر پختونخوا ذوالفقار حمید نے اپنے عہدے کا چارج سنبھال لیا ہے۔

سینٹرل پولیس آفس پشاور میں ایک باضابطہ تقریب کے دوران چاق و چوبند دستے نے نئے آئی جی پولیس کو سلامی پیش کی، اس موقع پر ذوالفقار حمید نے پولیس شہداء کی یادگار پر پھول چڑھائے اور ان کی قربانیوں کو خراجِ عقیدت پیش کیا۔

ذوالفقار حمید اس سے قبل ایڈیشنل آئی جی پی سپیشل برانچ لاہور کے طور پر فرائض انجام دے رہے تھے۔ نئے آئی جی نے دہشت گردی کے خلاف خیبر پختونخوا پولیس کی دلیری اور شجاعت کو سراہتے ہوئے کہا کہ پوری دنیا خیبر پختونخوا پولیس کی قربانیوں کی معترف ہے۔

 انہوں نے مزید کہا کہ دہشت گردی کے خاتمے تک ہم اپنے فرائض کو عبادت سمجھ کر ادا کرتے رہیں گے۔

ذوالفقار حمید کے مطابق خیبر پختونخوا پولیس نے ہمیشہ عوام کی خدمت اور امن کے قیام کے لیے بھرپور عزم اور حوصلے کے ساتھ کام کیا ہے، اور ان کا عزم ہے کہ یہ سلسلہ جاری رہے گا تاکہ صوبے میں امن قائم رہے۔