وزیراطلاعات پنجاب عظمیٰ بخاری نے کہا کہ ظالموں نے ماں اور بچے کی صحت پر خرچ ہونے والے فنڈز کو بھی نہیں بخشا۔

وزیراطلاعات پنجاب عظمیٰ بخاری نے اپنے ایک بیان میں کہا کہ خیبرپختونخوا میں بینظیر نشوونما پروگرام میں بڑے پیمانے پر مالی غبن اور گھوسٹ ملازمین کا انکشاف ہوا ہے۔

عظمیٰ بخاری نے کہا کہ ورلڈ فوڈ پروگرام نے اس پروگرام پر خیبرپختونخواہ میں کام روک دیا ہے، ورلڈ فوڈ پروگرام نے مالی بے ضابطگیوں، گھوسٹ ملازمین کے معاملے پر صوبائی حکومت پرسوالات اٹھائے ہیں۔

وزیراطلاعات پنجاب نے یہ بھی کہا کہ سرکاری دستاویزات میں صرف تنخواہوں میں 799ملین کی بے ضابطگیوں کی نشاندہی کی گئی ہے، جبکہ کرپشن کے خلاف جہاد کرنے کا اعلان کرنے والے علی امین کی ناک کے نیچے سے 799 ملین غائب ہوگئے ہیں۔

انہوں نے کہا کہ اس سے قبل مساجد کے آئمہ کرام کے نام پر 70کروڑ کے فنڈز غائب کردیے گئے، یہ تمام پیسہ سوشل میڈیا پر پاکستان اور اداروں کے خلاف مہم چلانے والے برگیڈ سیل کو دیے جاتے ہیں۔

عظمیٰ بخاری نے کہا کہ جس پیسے سے پشتون قوم کے بچوں کو اسکالرشپ، الیکٹرک بائیکس مل سکتی تھی وہ سوشل ٹرولز کی جیبوں میں جارہا، کے پی کے مشیر خزانہ ہر ہفتے وفاق کو فنڈز کی فراہمی کےلئے خط لکھتے ہیں۔

ان کا یہ بھی کہنا تھا کہ وفاق کے دیے فنڈز پشتونوں کی بجائے فوج مخالف پروپیگنڈے کرنے والے کو بانٹے جارہے ہیں۔