اسلام آباد: پاکستانی سفیر رضوان سعید شیخ نے سی پیک کو چین سے خلیج اور افریقی منڈیوں کو جوڑنے والا تبدیلی کا منصوبہ قرار دے دیا۔

پاکستان کے سفیر رضوان سعید شیخ نے امریکی جریدے  واشنگٹن ڈپلومیٹ کے معروف پروگرام ایمبیسیڈر انسائیڈر سیریز میں شرکت کی جہاں انہوں نے پاک امریکہ تعلقات، عاشی ترقی، تجارتی تعلقات اور سرمایہ کاری پر اظہار خیال کیا۔

اس موقع پر رضوان شیخ نے گفتگو کرتے ہوئے کہا کہ امریکہ، پاکستان کا سب سے بڑا تجارتی شراکت دار ہے، پاک امریکہ تعلقات میں تجارت  سب سے مستحکم پہلو رہا  ہے، بطور سفیر اولین ترجیح اقتصادی سفارت کاری  اور تجارتی روابط کو مستحکم کرنا ہے۔

سفیر پاکستان نے سی پیک کو چین سے خلیج اور افریقی منڈیوں کو جوڑنے والا تبدیلی کا منصوبہ قرار دیتے ہوئے کہا کہ پاکستان، امریکہ اور چین کے درمیان کسی مسابقت میں نہیں پھنسا۔

پاکستانی سفیر رضوان سعید شیخ نے پاکستان کو دنیا کی دو بڑی طاقتوں کے درمیان ایک پل قرار بھی دے دیا۔