وفاقی وزیر اطلاعات عطا تارڑ نے 190 ملین پاؤنڈ کیس سے متعلق اہم انکشافات کرتے ہوئے کہا ہے کہ پاکستان تحریک انصاف (پی ٹی آئی) کے بانی چیئرمین نے قومی خزانے کو اربوں روپے کا نقصان پہنچایا۔

سماجی رابطے کی ویب سائٹ ایکس پرعطا تارڑ نے کہا کہ بانی پی ٹی آئی نے 190 ملین پاؤنڈ (تقریباً 80 ارب روپے) کی لوٹی گئی رقم سے لاہور میں گھر تعمیر کیا۔ انہوں نے مزید کہا کہ اس کیس میں شریک ملزمان کو عدالت نے اشتہاری قرار دے دیا ہے۔

عطا تارڑ نے الزام عائد کیا کہ بشریٰ بی بی نے فرح گوگی کے ساتھ مل کر بدعنوانی کی اور قومی دولت لوٹی۔ انہوں نے کہا، “یہ پہلی بار سنا ہے کہ 5 قیراط کے ہیرے کی انگوٹھی بھی ہوتی ہے، اور یہ ہمیں بشریٰ بی بی کے ذریعے معلوم ہوا۔”

وفاقی وزیر نے مزید کہا کہ پی ٹی آئی کے کسی بھی فرد کے پاس بانی چیئرمین کی آمدنی کے ذرائع کا کوئی جواب نہیں۔ انہوں نے تنقید کرتے ہوئے کہا کہ اب پی ٹی آئی بانی خود کو سیرت پر چلنے والا کہہ رہے ہیں، لیکن حقیقت میں انہوں نے قوم کے اربوں روپے ہڑپ کیے۔

حکومتی موقف کے مطابق 190 ملین پاؤنڈ کیس میں ہونے والی کرپشن کے اثرات عوام پر بھی مرتب ہوئے، اور اس معاملے میں ملوث افراد کو قانون کے مطابق کٹہرے میں لایا جائے گا۔