اعلی ثانوی تعلیمی بورڈ نے طلبہ کو جعلی سوشل میڈیا اکاؤنٹس سے دور رہنے کا مشورہ دیا ہے۔

واضح رہے کہ انٹرمیڈیٹ کے متنازع نتائج سے گھبرائے طلبہ سے پیپر پاس کروانے کے عوض پیسے مانگے جانے کا انکشاف ہوا ہے۔

اعلیٰ ثانوی تعلیمی بورڈ نے سوشل میڈیا پر بورڈ آف انٹرمیڈیٹ ایجوکیشن کراچی سے ملتے جلتے چینلز اور پیجز سے لاتعلقی کا اظہار کرتے ہوئے کہا کہ مختلف جعلی پیجز سے طلبہ کے ساتھ فراڈ کی اطلاعات موصول ہوئی ہے۔

ترجمان اعلیٰ ثانوی تعلیمی بورڈ نے کہا کہ جعلی اکاؤنٹس کے ذریعے طلبہ کو غلط معلومات فراہم کی جارہی ہے، پریشان طلبہ سے  پیپر پاس کروانے کے عوض پیسے مانگے جارہے ہیں، جبکہ انٹرمیڈیٹ کے نام سے چلنے والے فیس بک، انسٹاگرام، واٹسپ چینلز تمام جعلی ہیں۔

ترجمان اعلی ثانوی تعلیی بورڈ کے مطابق اعلیٰ ثانوی تعلیمی بورڈ کراچی کے آفیشل پیجز تصدیق شدہ بلیو ٹک ہے، کسی بھی معلومات کے لیے طلبہ آفیشل پیجز اور ویب سائٹ سے رابطہ کریں، طلبہ جعلی اکاؤنٹس پر کسی سے رابطہ نہ کریں۔

انٹربورڈ کے نام سے جعلی سوشل میڈیا اکاونٹس اور پیجز کے حوالے سے انٹرمیڈیٹ بورڈ کے سیکریٹری نے ایف آئی اے کو خط لکھ دیا ہے۔

خط میں کہا گیا کہ سوشل میڈیا پر 34 مختلف جعلی پیجز کئی سالوں سے چل رہے ہیں، 2022  میں بھی ایف آئی اے کو جعلی پیجز کے حوالے سے شکایات درج کرائی گئی تھی، جبکہ مختلف سوشل میڈیا ایپ پر انٹر میڈیٹ بورڈ کے نام سے پیجز چلائے جا رہے ہیں۔

خط کے متن میں یہ بھی لکھا گیا کہ ان جعلی پیجز پر طلبہ کو غلط انفارمیشن دی جا رہی ہے، جعلی پیجز کے ذریعے طلبہ کے ساتھ فراڈ بھی کیا جارہا ہے۔

خط میں ان جعلی پیجز کے خلاف جلد کاروائی کرنے کی درخواست کی گئی ہے، جبکہ شاکر نامی  شخص متعدد جعلی پیجز چلا رہا ہے۔