میئر کراچی و ترجمان بلاول بھٹو زرداری بیرسٹر مرتضیٰ وہاب نے کہا ہے کہ پی ٹی آئی رہنما دوسروں کو جمہوریت کا سبق دینے کے بجائے خود اپنے گریبان میں جھانکیں۔

بیرسٹر مرتضیٰ وہاب نے پی ٹی آئی رہنما عمر ایوب کے بیان پر ردعمل دیتے ہوئے کہا کہ پیپلزپارٹی کی جمہوریت کے لیے قربانیوں کو دنیا جانتی ہے، جمہوریت کی بحالی میں پیپلزپارٹی قیادت نے اپنی جانیں نچھاور کی ہیں۔

انکا کہنا تھا کہ ڈکٹیٹروں کے سائے میں پلنے والے جمہوریت کے بارےمیں  کیا جانیں! جمہوریت پسند پی ٹی آئی کا پول نو مئی کے گھناؤنے واقعات نے سب پر عیاں کردیا ہے۔

مرتضیٰ وہاب نے مزید کہا کہ معصوم کارکنان کو ریاست مخالف بیانیے پر لگانے والے کون ہیں؟ مشکل وقت میں کارکنان کو اپنا ماننے سے انکار کردیا کیا یہ جمہوریت ہے؟ الزام تراشی پی ٹی آئی کا پرانا وطیرہ ہے۔