کراچی: پاکستان ٹیلی کام کمپنی (پی ٹی سی ایل) نے ڈیجیٹل اور ٹیلی کام نظام کی بہتری کے لئے پاکستان کو افریقہ-1 سب میرین کیبل سے منسلک کردیا ہے۔

پاکستان ٹیلی کام کمپنی لمیٹڈ نے ملک کے ڈیجیٹل اور ٹیلی کام نظام کو بہتر بنانے کے لیے ایک اہم قدم اٹھاتے ہوئے پاکستان کو افریقہ-1 سب میرین کیبل سسٹم سے منسلک کردیا ہے۔

یہ سب میرین کیبل بڑی مقدار میں ڈیٹا ٹرانسمیشن کی صلاحیت رکھتی ہے، اس کو کراچی میں پی ٹی سی ایل ایکسچینج سے جوڑا گیا ہے۔

پی ٹی سی ایل نے افریقہ-1 کیبل سسٹم کنسورشیم میں شمولیت کے لیے باضابطہ معاہدہ کیا ہے۔ اس اقدام کا مقصد عالمی ڈیجیٹل مراکز کے ساتھ پاکستان کے روابط کو مضبوط بنانا اور قومی ٹیلی کمیونی کیشن ڈھانچے کو مستحکم کرنا ہے۔

افریقہ-1 کیبل سسٹم دس ہزار کلومیٹر طویل ہے اور اس میں جدید ترین ٹیکنالوجیز شامل ہیں۔ یہ سسٹم پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی جیسے اسٹریٹجک اہمیت کے حامل ممالک سے جوڑے گا۔

پی ٹی سی ایل گروپ کے نائب صدر برائے انٹرنیشنل بزنس سید محمد شعیب نے کہا کہ افریقہ-1 کیبل سسٹم میں ہماری شرکت پاکستان کے ’ڈیجیٹل وژن 2030‘ کے عین مطابق ہے۔

انہوں نے کہا کہ ہم ڈیجیٹل تقسیم کا خاتمہ کرکے لوگوں کو بااختیار بنانے کے لیے پُرعزم ہیں تاکہ مختلف شعبوں میں جدت کو فروغ ملے اور ملکی معیشت مستحکم ہوسکے۔

سید محمد شعیب کا مزید کہنا تھا کہ افریقہ-1 کیبل سسٹم 2026 کے اوائل میں فعال ہوجائے گا جس کے بعد صارفین کو عالمی معیار کی انٹرنیٹ سہولیات دستیاب ہوں گی۔