حکومت نے آئی ایم ایف کی شرط کے تحت گریڈ 17 سے 22 تک کے تمام سرکاری ملازمین کو اپنے اور اہل خانہ کے ملکی و غیر ملکی اثاثے ظاہر کرنے کی پابندی عائد کرنے کی تیاری کر لی ہے۔

ذرائع کے مطابق کابینہ نے سول سرونٹس ایکٹ 1973 میں نئی دفعہ 15-A شامل کرنے کی منظوری دے دی ہے۔

اس ترمیم کے تحت سرکاری ملازمین کو اپنے اثاثوں کی تفصیلات پبلک کرنے ہوںگی، جن میں غیر ملکی بینک اکاؤنٹس، جائیدادیں اور کاروباری سرمایہ کاری شامل ہوں گے۔

تاہم، ایف بی آر کے پاس موجود ڈیٹا جیسے آئی ڈیز اور بانڈز کے نمبرز کو پرائیویٹ رکھا جائے گا۔

آنے والے دنوں میں ڈیجیٹل فائلنگ کے نظام کے تحت سرکاری ملازمین کو بیرون ملک جائیدادوں اور سرمایہ کاری کے بارے میں بھی تفصیلات فراہم کرنا لازم ہوگا۔

 اس ترمیمی مسودہ کی پارلیمنٹ میں منظوری کے لیے جلد پیش کیے جانے کی توقع ہے۔

ترمیم میں فیڈرل بورڈ آف ریونیو، وزارت خزانہ اور وزارت قانون کی سفارشات بھی شامل کی گئی ہیں، جس کے تحت سرکاری ملازمین کی پرائیویسی اور سیکیورٹی کو بھی مدنظر رکھا جائے گا۔