اسلام آباد: جوڈیشل کمشین نے آئینی بینچ کی تعداد 8 سے بڑھا کر 13 کردی۔

چیف جسٹس کی زیرصدارت جوڈیشل کمیشن کا اجلاس ختم ہوگیا جس میں آئینی بینچ کے ممبران میں توسیع کرنے کا فیصلہ کیا گیا ہے۔

جسٹس ہاشم کاکڑ، جسٹس عامر فاروق، جسٹس اشتیاق ابراہیم، جسٹس صلاح الدین پنور اور جسٹس شکیل احمد کو آئینی بینچ میں شامل کیا گیا ہے۔

علاوہ ازیں سندھ ہائی کورٹ کے آئینی بینچ کے لئے بھی تین مزید ججز نامزد کردیے گئے ہیں، جسٹس ریاضت سحر، جسٹس نثار احمد بھمبھرو اور جسٹس عبدالحامد کو شامل کیا گیا ہے۔

ذرائع کے مطابق جوڈیشل کمیشن میں فیصلہ کیا گیا کہ آئینی بینچ میں ہر صوبے کی مساوی نمائندگی ہوگی، وفاقی دارالحکومت کی بھی آئینی بینچ میں نمائندگی کا فیصلہ کیا گیا ہے۔

بلوچستان سے جسٹس ہاشم کاکڑ، اسلام آباد سے جسٹس عامر فاروق، خیبرپختواہ سے جسٹس اشتیاق ابراہیم اور جسٹس شکیل احمد سپریم کورٹ کے آئینی بنچ کا حصہ ہوں گے جب کہ سندھ سے جسٹس صلاح الدین پنہور آئینی بنچ میں شامل کیا گیا ہے۔

آئینی بینچ میں 5 نئے ججز کی شمولیت سے چاروں صوبوں سے 3، 3 ججز آئینی بینچ کا حصّہ ہوگئے جب کہ اسلام آباد سے ایک جج کو آئینی بینچ کا حصہ بنایا گیا ہے۔

دوسری جانب جوڈیشل کمیشن نے لاہور ہائی کورٹ میں چار ایڈیشنل ججز تعینات کرنے کی بھی منظوری دے دی ہے۔

غضنفر علی خان، طارق باجوہ، عبہر گل، تنویر احمد شیخ کے ناموں کی منظوری دی گئی، چاروں ججز کو ایک سال کے لئے ایڈیشنل جج لاہور ہائی کورٹ تعینات کیا گیا ہے۔

ذرائع کا کہنا ہے کہ راجہ غضنفر علی خان کو 14، عبیر گل خان کو 11 ووٹ ملے جب کہ تنویر احمد شیخ کو 10 اور طارق محمود باجوہ کو 12 ووٹ ملے۔