جدہ میں ہونے والی ’’میڈ اِن پاکستان‘‘ نمائش کامیابی سے اختتام پذیر ہوگئی۔

جدہ میں ہونے والی ’’میڈ اِن پاکستان‘‘ نمائش میں پاکستانی مصنوعات اور خدمات کی شاندار نمائش کی گئی جب کہ نمائش میں بڑی  تعداد میں شرکاء نے شرکت کی۔

وزیر تجارت جام کمال خان نے کہا کہ سعودی عرب میں پاکستانی کاروباروں کے لیے وسیع مواقع موجود ہیں۔ سعودی ویژن 2030، ایکسپو 2030 اور فیفا ورلڈ کپ 2034 پاکستانی کمپنیوں کے لیے نیا تجارتی افق ہے۔

جام کمال خان کہتے ہیں کہ پاکستانی ٹیکسٹائل، خوراک، کھیلوں کا سامان اور آئی ٹی سروسز کی سعودی مارکیٹ میں پذیرائی ہے، حکومت پاکستان کاروباری آسانیوں کو فروغ دینے کے لیے اقدامات کر رہی ہے۔

اس موقع پر انہوں نے کہا کہ سعودی عرب میں پاکستانی مصنوعات کی برانڈنگ کے لیے مزید تجارتی نمائشوں کا بھی اعلان کیا گیا جب کہ نمائش کے دوران پاک سعودی کاروباری شراکت داری کے نئے دروازے کھل گئے ہیں۔

وزیر تجارت مزید کہتے ہیں کہ نمائش میں کھیلوں کے سامان، طبی آلات، آٹو پارٹس، ٹیکسٹائل اور زرعی مصنوعات کی بھرپور نمائندگی کی گئی، پاکستانی کاروباری برادری سعودی عرب کے سیاحت اور تعمیراتی شعبے سے فائدہ اٹھائیں۔