وزیراعظم شہباز شریف کی زیر صدارت وفاقی کابینہ کا اجلاس منعقد ہوا، جس میں مختلف اہم فیصلے کیے گئے۔

وزارت مذہبی امور کی سفارش پر بین المذاہب ہم آہنگی پالیسی اور مذہبی رواداری کی حکمت عملی کی منظوری دی گئی۔

اس پالیسی کے تحت مذہبی رواداری کے حوالے سے ڈائیلاگ اور کانفرنسز کا انعقاد کیا جائے گا، جبکہ مذہبی اقلیتوں کے حقوق کی حفاظت کے لیے ایکشن پلان بھی شامل ہے۔

 نفرت آمیز مواد اور لٹریچر کی روک تھام کے لیے اقدامات اٹھانے کا بھی فیصلہ کیا گیا۔ علاوہ ازیں، مختلف فرقہ وارانہ تنازعات کے حل کے لیے لائحہ عمل تیار کیا جائے گا۔

وزیراعظم نے کہا کہ عوام کو اشیائے خورونوش کی ارزاں نرخوں پر فراہمی حکومت کی اولین ترجیح ہے اور رمضان میں اشیائے خوردو نوش کی مناسب قیمتوں پر فراہمی کے لیے حکمت عملی بنانے کی ہدایت کی۔

وفاقی اور صوبائی حکومتوں کو ہدایت کی گئی کہ وہ مل کر عوام کو سستے داموں اشیائے خور و نوش فراہم کریں۔

کابینہ نے ڈاکٹر حسن الامین کو قومی ادارہ برائے مطالعہ پاکستان، قائد اعظم یونیورسٹی کا ڈائریکٹر تعینات کرنے کی منظوری دی۔

طاہرہ رضا کو پانچ سال کے لیے اسٹیٹ بینک کے نان ایگزیکٹو ممبر کے طور پر تعینات کرنے کی بھی منظوری دی گئی۔

مزید برآں لیلیٰ ایلیاس کلپانہ اور محترمہ ستونت کور کی متروکہ وقف املاک بورڈ میں خواتین ممبران کے طور پر تعیناتی کی منظوری دی گئی۔

پاکستان اور عراق کے درمیان انکم ٹیکس اور کیپیٹل پر ڈبل ٹیکسیشن، ٹیکس چوری اور نادہندگی کے خاتمے کے حوالے سے کنونشن کے ابتدائی ڈرافٹ پر دستخط کرنے کی منظوری بھی دی گئی۔

اقتصادی رابطہ کمیٹی کے 3 فروری کے فیصلوں کی توثیق اور کمیٹی برائے لیجسلیٹو کیسز کے فیصلوں کی توثیق کی گئی، جبکہ کابینہ کمیٹی برائے ریاستی ملکیتی ادارہ جات کے فیصلوں کی بھی توثیق کی گئی۔