میئر کراچی بیرسٹر مرتضیٰ وہاب کی ہدایت پر واٹر کارپوریشن نے شبِ برات کے حوالے سے تمام انتظامات مکمل کرلیے ہیں۔

ایم ڈی واٹر کارپوریشن اسداللہ خان نے کہا کہ شہر بھر میں پانی کی فراہمی بلا تعطل جاری ہے اور قبرستانوں، مزاروں، عبادت گاہوں اور مساجد کے اطراف میں خصوصی انتظامات کیے گئے ہیں۔

اسداللہ خان کے مطابق، وادی حسین، میواہ شاہ، عیسیٰ نگری، سخی حسن، محمد شاہ، نیو کراچی، لیاقت آباد، خاموش کالونی، سچل گوٹھ، پہلوان گوٹھ، کورنگی، شاہ فیصل اور ماڈل کالونی کے قبرستانوں میں پانی فراہم کیا گیا ہے۔

 قبرستانوں کے اطراف میں شہریوں کو پینے کے پانی کی فراہمی کے لیے سبیلیں بھی لگائی گئی ہیں۔

انہوں نے مزید کہا کہ قبرستانوں میں قبروں کے اوپر پانی ڈالنے کے لیے رات بھر بلا تعطل پانی کی فراہمی جاری رہے گی اور واٹر ٹینکرز کے ذریعے خصوصی انتظامات کیے گئے ہیں۔

انچارج ہائیڈرنٹس سیل سردار شاہ تمام انتظامات کی خود نگرانی کر رہے ہیں، جبکہ فوکل پرسن ٹو ایم ڈی برائے ہائیڈرنٹس سیل شہباز بشیر قبرستانوں اور مساجد میں پانی کی دستیابی کو یقینی بنانے کے لیے آپریشن کی جگہ موجود ہیں۔