سیکیورٹی فورسز نے خیبرپختونخوا میں دو مختلف کارروائیاں کے دوران 7 خوارجی دہشت گردوں کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبرپختونخوا کے دو مختلف علاقوں میں آپریشنز کیے جس دوران 7 خوارجی دہشت گردوں کو ہلاک کیا گیا۔

آئی ایس پی آر کا کہنا ہے کہ سیکیورٹی فورسز نے ڈی آئی خان کے علاقے مڈی میں انٹیلی جنس بیسڈ آپریشن کیا، اس دوران 3 خوارج ہلاک  اور دو زخمی ہوئے جب کہ ہلاک خوارج میں رحمت شامل ہے۔

ترجمان پاک فوج نے بتایا کہ دوسرا انٹیلی جنس بیسڈ آپریشن شمالی وزیرستان کے علاقے میر علی میں کیا گیا اور اس آپریشن میں 4 خوارج ہلاک اور تین زخمی ہوئے۔

آئی ایس پی آر کا مزید کہنا تھا کہ علاقے میں دیگر دہشت گردوں کی تلاش کے لئے سینیٹائزڈ آپریشن جاری ہے جب کہ سیکیورٹی فورسز دہشت گردی کے خاتمے کے لئے پرعزم ہیں۔