فری اینڈ فیئر الیکشن نیٹ ورک (فافن) نے قومی اسمبلی کے 13 ویں سیشن میں ارکان کی حاضری سے متعلق رپورٹ جاری کر دی۔

 فافن کی رپورٹ میں انکشاف کیا گیا ہے کہ 77 ارکان نے مکمل حاضری دی جبکہ 46 اراکین نے کسی بھی اجلاس میں شرکت نہیں کی۔

فافن کی رپورٹ کے مطابق سیشن کے دوران سب سے زیادہ حاضری تیسری نشست میں دیکھی گئی، جس میں 205 ارکان شریک ہوئے، جب کہ چوتھی نشست میں سب سے کم 142 ارکان موجود رہے۔

رپورٹ کے مطابق 237 ارکان نے کم از کم ایک اجلاس سے غیر حاضری اختیار کی، جن میں سے 83 ارکان نے باضابطہ رخصت کی درخواست دی، جبکہ 154 بغیر اجازت اجلاس میں شریک نہیں ہوئے۔

فافن کے مطابق وزیر مملکت برائے خزانہ و توانائی علی پرویز ملک نے سب سے زیادہ 5 اجلاسوں میں شرکت کی، جبکہ وزیراعظم کسی بھی اجلاس میں شریک نہیں ہوئے۔ قائد حزب اختلاف نے تین نشستوں میں حاضری دی۔