پاکستان اور ترکیہ کے درمیان انسداد دہشت گردی کے حوالے سے مشاورت کا دوسرا دور اسلام آباد میں منعقد ہوا۔

 اس مشاورتی دور میں پاکستان کی نمائندگی ڈی جی انسداد دہشت گردی وزارت داخلہ عبدالحمید نے کی، جبکہ ترک وفد کی قیادت ڈی جی انٹیلی جنس اینڈ سیکیورٹی کنعان یلماز نے کی۔

ترجمان دفتر خارجہ کے مطابق، دونوں ممالک نے عالمی اور علاقائی سطح پر دہشت گردی سے متعلق امور کا جائزہ لیا اور خطے اور اس سے باہر دہشت گرد تنظیموں کے بڑھتے ہوئے خطرات پر بھی تبادلہ خیال کیا۔

مشاورتی دور کے دوران دونوں ممالک نے انسداد دہشت گردی کے لیے تعاون اور بہترین طریقہ کار کے تبادلے پر اتفاق کیا۔

پاکستان اور ترکیہ نے ایک دوسرے کے تجربات سے استفادہ کرنے اور شراکت داری جاری رکھنے کی اہمیت پر زور دیا، اور دہشت گردی سے نمٹنے کے لیے دوطرفہ تعاون کو مزید فروغ دینے پر اتفاق کیا۔

اس کے علاوہ، دونوں ممالک نے آئندہ مشاورتی دور کے لیے منصوبہ بنایا، جو ترکیہ کے دارالحکومت انقرہ میں منعقد ہوگا۔