اسلام آباد:وزیر اعظم شہباز شریف نے وزیرداخلہ محسن نقوی کو زبردست الفاظ میں خراج تحسین پیش کیا ہے۔

اسلام آباد میں جناح اسکوائر کی افتتاحی تقریب سے وزیر اعظم محمد شہباز شریف نے وفاقی وزیرداخلہ محسن نقوی کو زبردست الفاظ میں خراج تحسین پیش کیا ہے۔

وزیر اعظم نے اپنے خطاب میں کہا کہ محسن نقوی نے اسلام آباد میں پنجاب اسپیڈ کو محسن اسپیڈ میں بدل دیا ہے۔ محسن صاحب ویل ڈن، آپ دیگر منصوبوں کو بھی اسی رفتار سے تکمیل تک پہنچائیں گے۔

محمد شہباز شریف کہتے ہیں کہ محسن نقوی اور ان کی ٹیم نے جناح اسکوائر کو برق رفتاری، ذمہ داری اور فرض شناسی سے 72 روز میں مکمل کیا جو اپنی جگہ ایک ریکارڈ ہے۔

ان کا کہنا تھا کہ میں 3 انڈر پاسز پر مشتمل جناح اسکوائر کی تکمیل پر محسن نقوی اور سی ڈی اے کی پوری ٹیم کو مبارکباد دیتا ہوں۔

انہوں نے مزید کہا کہ آج ہم سب کے لیے یہ خوشی کا لمحہ ہے، محسن نقوی کی کاوشوں سے پچھلے ریکارڈز میں اضافہ ہورہا ہے جب کہ یہی وہ طریقہ ہے جو قوموں کی زندگیوں کو بدل دیتا ہے۔