پاکستان میں فائیو جی اسپیکٹرم کی نیلامی کا معاملہ تاخیر کا شکار ہو گیا، جس کی بڑی وجہ دو نجی موبائل کمپنیوں کا مجوزہ مرجر قرار دیا جا رہا ہے۔

ذرائع کے مطابق پاکستان ٹیلی کمیونیکیشن اتھارٹی (پی ٹی اے) نے اس معاملے پر وزارت آئی ٹی کو خط لکھ کر وضاحت طلب کر لی ہے۔

پی ٹی اے کا مؤقف ہے کہ انہیں بتایا جائے کہ آیا یہ مرجر مکمل ہوگا یا نہیں، کیونکہ اس غیر یقینی صورتحال کے باعث فائیو جی اسپیکٹرم کی نیلامی میں مشکلات پیش آ رہی ہیں۔

ذرائع کے مطابق نیلامی کے لیے یہ جاننا ضروری ہے کہ فائیو جی اسپیکٹرم تین کمپنیوں کے لیے پیش کیا جائے گا یا چار کمپنیوں کے لیے۔

پی ٹی اے کے مطابق یہ معاملہ اس وقت کمپٹیشن کمیشن میں زیر التوا ہے، اور فیصلہ آنے تک فائیو جی نیلامی کی حکمت عملی واضح نہیں ہو سکتی۔

اتھارٹی کا کہنا ہے کہ کمپٹیشن کمیشن کو جلد از جلد یہ طے کرنا ہوگا کہ وہ مرجر کی اجازت دیتا ہے یا اسے مسترد کرتا ہے تاکہ مستقبل کی پالیسیوں کو حتمی شکل دی جا سکے۔

ذرائع کے مطابق پی ٹی اے کے کنسلٹنٹ فائیو جی سپیکٹرم سے متعلق ایک جامع رپورٹ تیار کر رہے ہیں، تاہم مرجر کے حوالے سے حتمی فیصلے کے بغیر اس رپورٹ کو مکمل کرنا ممکن نہیں ہوگا۔

 حکومت اور متعلقہ ادارے نیلامی کے عمل کو شفاف اور موثر بنانے کے لیے صورتحال پر گہری نظر رکھے ہوئے ہیں۔