اسلام آباد: آزاد کشمیر کے صدر بیرسٹر سلطان محمود کا کہنا ہے کہ بھارت مقبوضہ کشمیر میں ریاستی دہشت گردی کی انتہا کرچکا ہے۔

صدر آزاد کشمیر بیرسٹر سلطان محمود نے کہا کہ بھارت اپنے ہتھیاروں سے کشمیری عوام کے جذبہ حریت کو دبا نہیں سکتا، بھارت مقبوضہ کشمیر میں ریاستی دہشت گردی کی انتہا کرچکا ہے۔

صدر آزاد کشمیر کا کہنا ہے کہ آزادی کی جدوجہد میں کشمیری عوام کے ساتھ شانہ بشانہ کھڑے ہیں، بھارت کی اقلیتیں مشکل حالات سے گزر رہی ہیں، دو قومی نظریہ درست ثابت ہورہا ہے۔

انہوں نے کہا کہ مقبوضہ کشمیر میں مودی کی ہندوتوا پالیسیوں کے باعث بھارت ٹوٹنے کے قریب ہے جب کہ مودی کا مکروہ چہرہ بین الاقوامی سطح پر بے نقاب ہوچکا ہے۔

بیرسٹر سلطان محمود کہتے ہیں کہ بھارت عالمی سطح پر دہشت گرد ریاست کے طور پر سامنے آرہا ہے۔ کینیڈا اور امریکا سمیت دیگر ممالک نے مودی کی ہندوتوا پالیسیوں کی مذمت کی ہے۔

انہوں نے بتایا کہ راٹھوعہ ہریام پل کا کام مکمل ہونے کے قریب ہے جو جلد عوام کے لیے کھولا جائے گا، آزاد کشمیر میں پہلا پارکنگ پلازہ جلد تعمیر کیا جائے گا۔

صدر آزاد کشمیر نے یہ بھی بتایا کہ میرپور میں انٹرنیشنل ایئرپورٹ اور سی پیک منصوبوں پر جلد کام شروع ہوگا جب کہ ہیلتھ کارڈ اسکیم جلد متعارف کرائی جارہی ہے۔ برطانیہ میں مقیم کشمیریوں نے ہمیشہ مسئلہ کشمیر کو اجاگر کیا ہے۔

بیرسٹر سلطان محمود نے برطانوی پارلیمنٹ میں کشمیریوں کے حق میں آواز بلند کرنے کا مطالبہ کرتے ہوئے مزید کہا کہ اقوام متحدہ کشمیری عوام کو حق خودارادیت دلانے میں کردار ادا کرے۔