گورنر سندھ کامران خان ٹیسوری نے جے ڈی سی کے زیر اہتمام “اپنی لیب” کا افتتاح کیا، جس کا مقصد غریب افراد کو کم قیمت پر طبی سہولتیں فراہم کرنا ہے۔

اس موقع پر گورنر سندھ کو بریفنگ دیتے ہوئے بتایا گیا کہ “اپنی لیب” کے تحت مختلف طبی ٹیسٹ انتہائی کم قیمت پر فراہم کیے جائیں گے، جس سے عوام کو بڑی سہولت ملے گی۔

گورنر سندھ نے میڈیا سے بات کرتے ہوئے کہا کہ جے ڈی سی ایک قابل قدر ادارہ ہے جو انسانیت کی بلا تفریق خدمت کر رہا ہے۔

انہوں نے مزید کہا کہ جے ڈی سی کے فلاحی منصوبوں میں مردہ خانہ، فری ڈائیلیسس، فری لیب اور دیگر بے شمار اقدامات شامل ہیں۔ کامران خان ٹیسوری نے بتایا کہ جے ڈی سی کی فری لیب سے اب تک 48 لاکھ سے زائد ٹیسٹ ہو چکے ہیں، جو ادارے کی کامیابی کا منہ بولتا ثبوت ہیں۔

گورنر سندھ نے جے ڈی سی کے سربراہ ظفر عباس کو سراہتے ہوئے کہا کہ “جہاں کہیں بھی شہر میں مسائل ہوں، ظفر عباس فوراً وہاں پہنچ جاتے ہیں اور عوام کی خدمت کرتے ہیں۔

انہوں نے مزید کہا کہ جے ڈی سی کے تحت 3 ہزار روپے کا سٹی اسکین صرف 1500 روپے میں دستیاب ہوگا، اور اس کے علاوہ 1200 روپے کی ٹیکنیشن فیس پر سٹی اسکین اور وینٹی لیٹر ٹاور کی سہولت بھی فراہم کی جائے گی۔

کامران خان ٹیسوری نے مخیر حضرات سے اپیل کی کہ وہ اپنی زکوة اور عطیات جے ڈی سی کو بھی دیں تاکہ اس کے فلاحی منصوبوں کو مزید وسیع کیا جا سکے۔ گورنر سندھ نے کہا کہ جے ڈی سی نے 50 کروڑ روپے کی سٹی اسکین مشین بھی منگوائی ہے، جس سے علاج کی لاگت کو کم کرنے میں مدد ملے گی۔

اس افتتاحی تقریب میں جے ڈی سی کے دیگر فلاحی منصوبوں اور ان کے مستقبل کے اقدامات پر بھی گفتگو کی گئی، جس کے بعد گورنر سندھ نے جے ڈی سی کے کاموں کی مزید حمایت کا عہد کیا۔