پلڈاٹ کی تازہ رپورٹ میں وفاقی وزرا کی پارلیمانی حاضری اور کارکردگی کا تفصیلی تجزیہ پیش کیا گیا ہے، جس میں وفاقی وزرا کی پارلیمنٹ میں شرکت، خطاب کے اوقات اور قانون سازی کی کارکردگی کو اجاگر کیا گیا۔

رپورٹ کے مطابق، وزیر اعظم کے اہم وزرا کی پارلیمنٹ میں حاضری کی شرح محدود رہی، جس پر سوالات اٹھائے گئے ہیں۔

رپورٹ میں بتایا گیا کہ وزیر قانون اعظم نذیر تارڑ نے 157 اجلاسوں میں سے 89 میں شرکت کی اور 17 گھنٹوں سے زائد پارلیمنٹ میں خطاب کیا۔

وزیر خارجہ خواجہ آصف نے 69 اجلاسوں میں شرکت کی اور 5.5 گھنٹے تک خطاب کیا، جبکہ وزیر خزانہ نے 35 اجلاسوں میں شرکت کی اور 4 گھنٹے خطاب کیا۔

دوسری جانب، وزیر داخلہ محسن نقوی نے صرف 10 اجلاسوں میں شرکت کی اور صرف 12 منٹ تک خطاب کیا، جبکہ احد چیمہ نے 9 اجلاسوں میں شرکت کی اور ایک منٹ کا خطاب کیا۔

قیصر احمد شیخ نے 67 اجلاسوں میں شرکت کی لیکن صرف 31 منٹ تک پارلیمنٹ میں اظہار خیال کیا۔

رپورٹ میں پارلیمنٹ کی قانون سازی کی کارکردگی بھی شامل کی گئی، جس کے مطابق پارلیمنٹ نے ایک سال میں 38 حکومتی بلز کی منظوری دی۔

تاہم، کابینہ میں صرف ایک خاتون وزیر اور کوئی غیر مسلم وزیر شامل نہیں ہے، جو کہ سوالات کا باعث بنا ہے۔

رپورٹ میں یہ بھی کہا گیا ہے کہ پارلیمنٹ میں وزرا کی کم حاضری کے باوجود، پارلیمنٹ نے ایک سال میں ریکارڈ قانون سازی کی۔