لاہور سمیت پنجاب بھر میں موٹر سائیکل سواروں کی اسپیڈ کنٹرول کرنے کے لئے ٹریفک پولیس کو متحرک کرنے کا فیصلہ کیا گیا ہے۔

حکومت کی جانب سے جاری کردہ نوٹیفکیشن کے بعد تمام سی ٹی اوز (چیف ٹریفک آفیسرز) اور ڈی ٹی اوز (ڈسٹرکٹ ٹریفک آفیسرز) کو عملدرآمد کے لئے مراسلہ جاری کر دیا گیا ہے۔

مراسلے میں کہا گیا ہے کہ لاہور سمیت صوبے کے تمام اضلاع میں موٹر سائیکل سواروں کی رفتار پر کڑی نظر رکھی جائے اور ان کی اسپیڈ کو 60 کلومیٹر فی گھنٹہ تک محدود کرنے کے لیے موثر اقدامات کیے جائیں۔

حکام نے اس بات پر زور دیا ہے کہ یہ اقدام حادثات کی روک تھام اور قیمتی جانوں کے ضیاع کو بچانے کے لیے انتہائی ضروری ہے۔

ٹریفک پولیس حکام نے بتایا کہ اسپیڈ گنز کی مدد سے موٹر سائیکل سواروں کی رفتار پر نظر رکھی جائے گی اور جہاں ای چالاننگ کیمرے فعال ہیں، ان کا استعمال بھی بڑھایا جائے گا تاکہ رفتار کی خلاف ورزی کو مزید مؤثر طریقے سے کنٹرول کیا جا سکے۔

مزید برآں، پولیس حکام نے اعلان کیا ہے کہ پنجاب بھر میں مزید اسپیڈ گنز خریدی جائیں گی تاکہ مانیٹرنگ کے عمل کو مزید بہتر بنایا جا سکے۔

ایڈیشنل آئی جی ٹریفک کے حکم پر ایس ایس پی ٹریفک سید غضنفر علی شاہ نے اس اقدام کا مراسلہ جاری کیا ہے۔

یہ اقدامات لاہور اور دیگر اضلاع میں ٹریفک کی صورتحال کو بہتر بنانے اور حادثات کے خطرات کو کم کرنے کے لیے اٹھائے گئے ہیں۔