رمضان المبارک سے قبل مہنگائی کی شرح میں اضافہ جاری ہے۔

ادارہ شماریات نے ہفتہ وار بنیادوں پر مہنگائی کے اعدادوشمار جاری کردئیے، جس کے مطابق ایک ہفتے میں مہنگائی کی شرح میں 0.38 فیصد کا اضافہ ریکارڈ کیاگیا۔

ایک ہفتے میں سالانہ بنیادوں پر مہنگائی بڑھنے کی شرح 0.32 فیصد رہی، ایک ہفتے میں 19 اشیاء کی قیمتوں میں اضافہ ریکارڈ کیا گیا، جبکہ ایک ہفتے میں 11 اشیاء کی قیمتوں میں کمی اور 21 کی قیمتوں میں استحکام رہا۔

 ادارہ شماریات کے مطابق ٹماٹر کی فی کلو قیمت میں 6 روپے سے زیادہ کا اضافہ، جبکہ کیلے کی فی درجن قیمت 14 روپے بڑھ گئی، ایک ہفتے میں انڈے فی درجن 15 روپے تک مہنگے ہوئے، اس کے علاوہ زندہ مرغی کی فی کلو قیمت میں 19 روپے تک کا اضافہ ہوا۔

  چینی کی فی کلو قیمت 2 روپے 41 پیسے بڑھ گئی، جبکہ چاول، آلو، پیاز، گوشت، تازہ دودھ، دال مسور، دال مونگ مہنگی ہونے والی اشیاء میں شامل ہیں۔

ادارہ شماریات نے بتایا کہ ایک ہفتے کے دوران چائے پتی کا 190 گرام پیکٹ 34 روپے 41 پیسے سستا ہوا، اسی طرح گزشتہ ہفتے میں بریڈ کی قیمت میں 1 روپے 83 پیسے کمی ہوئی۔

 ایک ہفتے کے دوران دال ماش 5 روپے 41 پیسے فی کلو سستی ہوئی، جبکہ گزشتہ ہفتے کے دوران لہسن فی کلو 7 روپے 9 پیسے سستا ہوا، اس کے علاوہ گندم کا آٹا،گھی اور ایل پی جی گھریلو سلنڈر بھی سستی ہونے والی اشیاء میں شامل ہیں۔

ادارہ شماریات کے مطابق دہی، نمک، شٹرنگ، کپڑوں سمیت 21 اشیاء کے دام مستحکم بھی رہے۔