کراچی: قومی ایئر لائن پی آئی اے کی جانب سے برطانیہ کے لیے فلائٹ آپریشن شروع کرنے کی تیاریاں عروج پر ہیں۔

برطانوی محکمہ برائے ٹرانسپورٹ ڈی ایف ٹی کی ٹیم کی جانب سے پی آئی اے کے فضائی حفاظتی شعبوں سے متعلق آڈٹ جاری ہے جبکہ قومی ایئر لائن کی طرف سے 4 سال بعد برطانیہ کے لیے فلائٹ آپریشن کے حوالے سے تیاریاں جاری ہیں۔

پی آئی اے نے لندن کے ہتھرو ایئرپورٹ پر اپنے سلاٹ کی فعالی اور ٹریمنل 4 سے آپریشن شروع کرنے کے حوالے سے کام شروع کردیا ہے، ڈی ایف ٹی کا آڈٹ مکمل ہونے کا بھی قوی امکان ہے، جس کے بعد پی آئی اے پر سے برطانیہ پابندی ختم کر دے گا۔

ذرائع کے مطابق قومی ایئرلائن مارچ کے وسط سے مانچسٹر اور لندن کیلئے اسلام آباد سے اپنی براہ راست پروازوں کا آغاز کرے گا، پی آئی اے بوئنگ 777 طیارے برطانیہ آپریشن میں استعمال کرے گا۔

ذرائع نے بتایا ہے کہ قومی ایئرلائن یورپ کے مختلف سیکٹر، میلان، اسپین کیلئے بھی اپنی پروازیں شروع کرنے کے حوالے سے حکمت عملی تیار کر رہا ہے۔