اسلام آباد: وفاقی کابینہ میں توسیع کے معاملے پر پندرہ سے بیس اراکین کی فہرست باضابطہ منظوری کے لیے مسلم لیگ (ن) کے صدر نواز شریف کو بھجوا دی گئی۔

ذرائع ن لیگ کے مطابق کابینہ میں توسیع کے معاملے پر اتحادیوں سے بھی مشاورت مکمل کرلی گئی ہے، تاہم پیپلز پارٹی نے وفاقی کابینہ میں شمولیت کی پیش کش پھر ٹھکرا دی۔

ذرائع کا کہنا ہے کہ وزیراعظم کی وطن واپسی کے بعد نئے کابینہ اراکین کے حلف اٹھانے کا امکان ہے، پانچ سے زائد وفاقی وزراء، دس وزراء مملکت جبکہ بعض کو مشیر اور معاونین خصوصی بنایا جائے گا۔

ذرائع کے مطابق طارق فضل چوہدری کو وزارت قومی صحت ملنے اور خالد مگسی کو وزارت مواصلات دیے جانے کا امکان ہے، تاہم ایم کیو ایم کے مصطفیٰ کمال کو وزارت سائنس و ٹیکنالوجی یا بحری امور کی وزارت دی جاسکتی ہے۔

اس کے علاوہ ن لیگ کے بیرسٹر عقیل، طلال چوہدری، محمد افضل کھوکھر، عبد الرحمان کانجو، سردار محمد یوسف اور نوشین افتخار بھی دوڑ میں شامل ہیں۔

ذرائع نے مزید بتایا کہ رومینہ خورشید عالم، رضا حیات ہراج، چوہدری ریاض، علی زاہد چوہدری، جنید انوار چوہدری کے ناموں پر بھی غور کیا جارہا ہے جبکہ رانا مبشر اقبال اور بلال اظہر کیانی بھی دوڑ میں شامل ہیں، تاہم وزیراعظم کے سابق پرنسپل سیکریٹری ڈاکٹر توقیر کو مشیر بنایا جائے گا۔