وزارت خزانہ کی جانب سے کہا گیا ہے کہ آئی ایم ایف سے رضامندی کی صورت میں ہی تنخواہ دار طبقے کو ریلیف مل سکے گا۔

وزارت خزانہ کے ذرائع کے مطابق عالمی مالیاتی ادارے (آئی ایم ایف) وفد اقتصادی جائزہ کیلئے 3 مارچ کو پاکستان آئے گا، جبکہ آئی ایم ایف کیساتھ اقتصادی جائزہ مذاکرات 15 مارچ تک جاری رہیں گے۔

ذرائع نے بتایا کہ پہلے مرحلے میں تکنیکی اور دوسرے مرحلے میں پالیسی سطح کے مذاکرات ہوں گے، جبکہ نیتھن پورٹر کی قیادت میں 9 رکنی وفد تقریبا دو ہفتے پاکستان میں قیام کرے گا، اس کے علاوہ آئی ایم ایف وفد آئندہ مالی سال 2025-26 بجٹ کیلئے تجاویز بھی دے گا۔

ذرائع کے مطابق وزارت خزانہ، وزارت توانائی، منصوبہ بندی، اسٹیٹ بینک کے علاوہ، ایف بی آر، اوگرا، نیپرا سمیت دیگر اداروں اور وزارتوں کیساتھ مذاکرات ہوں گے۔

وزارت خزانہ کے ذرائع نے بتایا کہ پنجاب، سندھ، خیبرپختونخواہ اور بلوچستان سے الگ الگ مذاکرات ہوں گے، جبکہ کلائمیٹ فنانسنگ پر تکنیکی وفد کیساتھ آج پنجاب، بلوچستان کیساتھ مذاکرات ہوں گے۔