پاک بحریہ کی مشق “سی گارڈ 2025” کی افتتاحی تقریب کراچی میں منعقد ہوئی۔

پاک فوج کے شعبہ تعلقات عامہ (آئی ایس پی آر) کے مطابق افتتاحی تقریب میں پاکستان میری ٹائم سیکیورٹی ایجنسی (پی ایم ایس اے)، نیشنل شپنگ کارپوریشن، کوسٹ گارڈز، اے این ایف، کسٹمز، کے پی ٹی، پورٹ قاسم اور ایف آئی اے کے نمائندگان نے شرکت کی۔

اس موقع پر سول اداروں، این جی اوز اور ماہی گیربرادری کے نمائندے بھی موجود تھے۔

تقریب میں شریک افراد کو مشق کے مقاصد اور میری ٹائم انفارمیشن اینڈ کوآرڈی نیشن سینٹر کی کوششوں پر بریفنگ دی گئی۔

آئی ایس پی آر کے مطابق، 50 سے زائد قومی اسٹیک ہولڈرز کی شرکت پر شکریہ ادا کیا گیا۔

کمانڈر کوسٹ نے خطاب کرتے ہوئے کہا کہ پاک بحریہ میری ٹائم ڈومین میں روایتی خطرات اور غیر روایتی چیلنجز سے نمٹنے کے لئے ہمہ وقت تیار ہے۔

انہوں نے مزید کہا کہ یہ مشق سمندری راستوں سے منشیات، ہتھیاروں، اور انسانی اسمگلنگ کی روک تھام کے لیے ہمارے عزم کا مظہر ہے۔

آئی ایس پی آر کے مطابق کمانڈر کوسٹ نے مزید کہا کہ اس مشق کا مقصد جے ایم آئی سی سی پلیٹ فارم کے تحت قومی اسٹیک ہولڈرز کی کاوشوں کو ہم آہنگ کرنا ہے، تاکہ سمندری سیکیورٹی کو مزید مستحکم کیا جا سکے۔