اسلام آباد: سپریم کورٹ کے جسٹس منصور علی شاہ نے کہا ہے کہ کچھ غلط کیا ہی نہیں تو ریفرنس کا ڈر کیوں ہونا، اللہ مالک ہے۔

سپریم کورٹ میں حلف برداری تقریب کے بعد جسٹس منصور علی شاہ کی صحافیوں غیررسمی گفتگو کی، صحافی نے ان سے سوال کیا کہ کہا جاتا ہے کہ آپ لوگ کام نہیں کرتے؟

جسٹس منصور علی شاہ نے جواب دیتے ہوئے کہا کہ مقدمات نمٹانے کی شرح دیکھ لیں، کس کے کتنے فیصلے قانون کی کتابوں میں شائع ہوئے سب سامنے ہے، تمام ریکارڈ سپریم کورٹ کی ویب سائٹ پر موجود ہے،

جسٹس منصور علی شاہ نے صحافی کو مسکراتے ہوئے جواب دیا کہ ابھی تو حلف برداری کے بعد چائے پینے آیا ہوں۔

صحافی نے سوال کیا کہ سنا ہے آپ کےخلاف ریفرنس آ رہا ہے؟ جس پر جسٹس منصور نے کہا کہ ریفرنس جب آئے گا تب دیکھی جائے گی، کچھ غلط کیا ہی نہیں تو ریفرنس کا ڈر کیوں ہونا، اللہ مالک ہے۔

انہوں نے مزید کہا کہ کسی سے کوئی ذاتی عناد یا اختلاف نہیں، کمرے میں موجود ہاتھی کسی کو نظر نہ آئے تو کیا کہ سکتے، باقی تمام ججز کے ساتھ ملاقات ہوتی ہے اکٹھے چائے بھی پیتے ہیں۔