صدر ایف پی سی سی آئی عاطف اکرام شیخ نے کہا کہ شرح سود میں کمی سے معاشی سرگرمیوں کا فروغ، محصولات میں مزید اضافہ ہو گا۔

صدر ایف پی سی سی آئی عاطف اکرام شیخ نے ریکارڈ محصولات جمع ہونے پر اہم بیان دیتے ہوئے کہا کہ معاشی چیلنجز کے باوجود جنوری میں ریکارڈ 872 ارب کی ٹیکس کلیکشن خوش آئند ہے، یہ اعدادوشمار ظاہر کرتے ہیں کہ بزنس کمیونٹی ٹیکس دینا چاہتی ہے۔

عاطف اکرام شیخ نے کہا کہ ایف بی آر کی کارکردگی کو بہتر بنا کر محصولات کا ہدف بھی  حاصل کیا جا سکتا ہے، غیر منصفانہ، کاروبار مخالف ٹیکس نظام محصولات کے ہدف کے حصول میں رکاوٹ ہے۔

صدر ایف پی سی سی آئی کا یہ بھی کہنا تھا کہ منصفانہ ٹیکس نظام صرف وفاقی سطح پر 34 ٹریلین محصولات حاصل کر سکتا ہے، وفاقی، صوبائی اور مقامی سطح پر سادہ، کم شرح اور وسیع البنیاد ٹیکسز کا نفاذ ضروری ہے۔

عاطف اکرام شیخ نے کہا کہ ایف بی آر میں اصلاحات کے بغیر اڑان پاکستان خود کفالت کی منزل کا حصول ممکن نہیں، انکم ٹیکس فارم آسان بنانے، کسٹمز میں فیس لیس سسٹم کے ذریعے شفافیت جیسے اقدامات کئے جائیں۔

صدر ایف پی سی سی آئی نے مطالبہ کیا کہ ایف بی آر محصولات کے مقدمات جلد نمٹانے کے لیے بھی اقدمات کرے۔