اسلام آؓباد: سپریم کورٹ نے مقدمات کے جلد سماعت کے حوالے سے پالیسی تشکیل دے دی ہے۔

پالیسی دستاویز کے مطابق ضمانت اور ضمانت قبل از گرفتاری کے مقدمات کو جلد سنا جائے گا، تمام انتخابی عذرداریوں کو سماعت کے لئے جلد مقرر کیا جائے گا۔

پالیسی دستاویز میں بتایا گیا ہے کہ مقدمات کی منتقلی، کمپرومائز اور فیملی مقدمات کو بھی سماعت کے لئے جلد مقرر کیا جائے گا جب کہ ایسے مقدمات میں جلد سماعت کے لئے درخواست دینے کی بھی ضرورت نہیں ہوگی۔

پالیسی میں کہا گیا ہے کہ جلد سماعت کی درخواست وکیل کی جانب سے تیار اور اے او آر کی جانب سے دائر ہوگی، کسی مقدمہ میں جلد سماعت کی درخواست میں معقول وجہ کا ہونا لازمی ہوگا۔

پالیسی دستاویز میں مزید بتایا گیا ہے کہ درخواست کے ہمراہ مقدمہ میں فوری سماعت کی وجہ کا ثبوت لف کرنا بھی لازم ہوگا جب کہ جلد سماعت کی درخواست مسترد ہونے پر نئی وجہ کی بنیاد پر ہی دوبارہ دائر ہوسکے گی۔