وفاقی وزیر عبدالعلیم خان نے آذربائیجان کے وزیر اعظم علی اسادوف سے ملاقات کی جس میں دونوں ممالک کے درمیان سرمایہ کاری اور تجارتی تعاون کے وسیع امکانات پر تبادلہ خیال کیا گیا۔

اس موقع پر وفاقی وزیر عبدالعلیم خان نے کہا کہ پاکستان میں سرمایہ کاری کے لیے متعدد مواقع موجود ہیں اور آذربائیجان کو موٹروے اور دیگر شعبوں میں سرمایہ کاری کی دعوت دی۔

انہوں نے اس بات کا بھی عندیہ دیا کہ پاکستان اور آذربائیجان کے درمیان دو ارب ڈالر کے سرمایہ کاری معاہدے ہوں گے، جس سے دونوں ممالک کے اقتصادی تعلقات کو مزید فروغ ملے گا۔

آذربائیجان کے وزیر اعظم علی اسادوف نے پاکستان کی اقتصادی ترقی پر خوشی کا اظہار کرتے ہوئے توانائی، تجارت اور بنیادی ڈھانچے کے شعبوں میں دوطرفہ تعاون کو مزید مستحکم کرنے کی خواہش ظاہر کی۔

 اس ملاقات میں پاکستان اور آذربائیجان کے درمیان تجارتی راہداریوں اور ریلوے منصوبوں پر بھی تبادلہ خیال کیا گیا۔

اس بات کا بھی یقین دلایا گیا کہ آذربائیجان پاکستان میں سرمایہ کاری بڑھانے کے لیے اقدامات کرے گا۔ دونوں ممالک نے مفاہمتی یادداشتوں (MoUs) پر پیش رفت کا جائزہ لیا، اور اس بات پر اتفاق کیا کہ پاکستان اور آذربائیجان کے اقتصادی تعلقات ایک نئے اور مستحکم دور میں داخل ہو رہے ہیں۔