وزیرِاعلیٰ پنجاب مریم نواز شریف نے کہا کہ محبت، بھائی چارے اور امن کا پیغام کو عام کریں، ایسا معاشرہ تشکیل دیں جہاں انتہا پسندی کی گنجائش نہ ہو۔

وزیرِاعلیٰ پنجاب مریم نواز شریف نے بین المذاہب ہم آہنگی کے عالمی ہفتہ پر پیغام دیتے ہوئے کہا کہ پنجاب سب کا ہے، اور یہاں ہر شخص بلا خوف و خطر اپنی عبادات سرانجام دے سکتا ہے۔

 مریم نواز نے کہا کہ تمام مذاہب محبت، امن و رواداری کا درس دیتے ہیں جو حقیقی فلاحی معاشرے کی بنیاد ہے، اختلافات ضرور رکھیں لیکن دین کی تعلیم اور تہذیب کا دامن نہ چھوڑیں۔

وزیرِاعلیٰ پنجاب نے کا یہ بھی کہنا تھا کہ ایک دوسرے کے عقائد کا احترام کرنا اور ہم آہنگی کو فروغ دینا ہی پائیدار امن و ترقی کی ضمانت ہے، پاکستان ہمیشہ سے مختلف مذاہب، ثقافتوں اور روایات کا حسین گلدستہ رہا ہے، پاکستان خصوصاً پنجاب میں ہر شہری کو برابری کے حقوق حاصل ہیں۔

مریم نواز نے کہا کہ قائداعظم کے افکار کی روشنی میں اقلیتوں کے تحفظ اور مساوی مواقع کے لیے عملی اقدامات کر رہی ہے، حال ہی میں مینارٹی کارڈ لانچ کیا ہے جس سے نادار اقلیتی بہن بھائیوں کو سہ ماہی مالی معاونت دی جا رہی ہے۔

وزیرِاعلیٰ پنجاب نے یہ بھی کہا کہ مندروں، گرجا گھروں اور دیگر عبادت گاہوں کی بحالی کی جارہی ہے، اقلیتی برادری کے تہوار حکومتی سطح پر منائے جا رہے ہیں۔

 مریم نواز نے مزید یہ بھی کہا کہ اقلیتوں کے بجٹ کو خاطرخواہ حد تک بڑھایا گیا ہے، اقلیتوں تعلیمی و روزگار کے مواقع میں اضافہ کیا جارہا ہے۔