اسلام آباد: جمعیت علماء اسلام (جے یو آئی) کے سربراہ مولانا فضل الرحمان نے عید الفطر کے موقع پر اہل وطن اور امت مسلمہ کو مبارکباد پیش کی۔

انہوں نے دعا کی کہ اللہ کریم بار بار ہمیں یہ خوشیاں نصیب فرمائے اور ہماری عبادات کو شرف قبولیت عطا کرے۔

مولانا فضل الرحمان نے اس مبارک مہینے اور عید کی خوشی کے موقع پر دنیا بھر میں موجود مسلمانوں کی مشکلات اور تکالیف کا ذکر کیا، خاص طور پر غزہ کے مسلمانوں پر اسرائیلی بربریت کو تنقید کا نشانہ بنایا۔

 انہوں نے کہا کہ رمضان کے مقدس مہینے میں بھی غزہ کے مسلمانوں پر اذیتیں دی جا رہی ہیں۔

جے یو آئی سربراہ نے کہا کہ مسلمان ایک جسم کی مانند ہیں اور جب جسم کا کوئی حصہ تکلیف میں ہو تو پورا جسم اس تکلیف کو محسوس کرتا ہے۔

اس وقت دنیا بھر میں جہاں مسلمان تکلیف میں ہیں، ہم ان کی تکلیف کو اپنے دل میں محسوس کرتے ہیں۔

عید کی خوشی کے موقع پر مولانا فضل الرحمان نے مسلمانوں کو اپنے گرد و پیش ضرورت مندوں، فقراء اور حاجتمندوں کی ضروریات کا خیال رکھنے کی اپیل کی اور کہا کہ یہی ہمارے دین کی تعلیمات ہیں۔

انہوں نے رمضان المبارک میں علماء کرام اور جماعتی رہنماؤں کی شہادتوں پر افسوس کا اظہار کرتے ہوئے عید کے موقع پر شہداء کے ایصال ثواب کے لیے قرآن خوانی کا اہتمام کرنے کی درخواست کی۔

مولانا فضل الرحمان نے امن و امان کی ناقص صورتحال کے پیش نظر نماز عید الفطر اور دیگر اجتماعات میں خود بھی سیکورٹی کا خیال رکھنے اور انتظامیہ کے ساتھ بھرپور تعاون کرنے کی ضرورت پر زور دیا۔

 انہوں نے بے جا اخراجات اور اسراف سے بچتے ہوئے سادگی سے عید منانے کی بھی اپیل کی۔