اسلام آباد: وزیر اعظم شہباز شریف سے یورپی یونین کی سفیر ڈاکٹر رینا کیونکا نے ملاقات کی ہے۔

وزیر اعظم محمد شہباز شریف سے یورپی یونین (EU) کی سفیر ڈاکٹر رینا کیونکا نے وزیر اعظم ہاؤس میں ملاقات کی جس دوران وزیراعظم نے بلوچستان میں جعفر ایکسپریس ٹرین پر حالیہ دہشت گردانہ حملے پر یورپی یونین کی سفیر کا اظہار تعزیت پر شکریہ ادا کیا۔

وزیر اعظم نے اس موقع پر ملک سے دہشت گردی کی عفریت کے خاتمے کے لیے پاکستان کے پختہ عزم کا اظہار کرتے ہوئے کہا کہ پاکستان اور یورپی یونین کے درمیان دیرینہ دوستانہ تعلقات ہیں جب کہ ان تعلقات میں مثبت پیش رفت پر اطمینان کا اظہار کیا گیا۔

انہوں نے پاکستان کی یورپی یونین کے ساتھ تعاون پر مبنی شراکت داری، بالخصوص جی ایس پی پلس اسکیم کو مزید مضبوط بنانے کی خواہش کا اعادہ کیا جس نے اپنے آغاز سے ہی دونوں فریقین کو بھرپور فائدہ پہنچایا۔

دونوں رہنماؤں نے انسانی حقوق سمیت پاکستان اور یورپی یونین کے تعلقات کے مختلف پہلوؤں پر تبادلہ خیال کیا۔

وزیراعظم نے مئی میں اسلام آباد میں منعقد ہونے والے پہلے پاکستان-یورپی یونین کے اعلیٰ سطح بزنس فورم کے انعقاد کا خیرمقدم کیا اور یورپی یونین کی سفیر کو اس تقریب کی کامیابی کے لیے پاکستان کے مکمل تعاون اور سہولت کا یقین دلایا۔

یورپی یونین کی سفیر نے وزیر اعظم کو یورپی یونین کے وفود کے حالیہ پاکستان کے دوروں اور آئندہ دوروں کے بارے میں بھی آگاہ کیا۔