چیف آف آرمی اسٹاف جنرل سید عاصم منیر نے بہاولپور چھاونی کا دورہ کیا جہاں انہیں بہاولپور کور کی آپریشنل تیاریوں اور تربیتی امور پر بریفنگ دی گئی۔

پاک فوج کے شعبہ تعلقات عامہ (آئی ایس پی آر) کے مطابق  آرمی چیف نے بہاولپور کور کے افسروں اور جوانوں سے خطاب کرتے ہوئے ان کی بے مثال لگن، غیر متزلزل جذبے، بلند حوصلے اور جنگی تیاریوں کو سراہا۔

جنرل عاصم منیر نے اس موقع پر سی ایم ایچ انسٹیٹیوٹ آف میڈیکل سائنسز، انووسٹا چولستان اور انٹیگریٹڈ کمبیٹ سمولیٹر ارینا کا افتتاح بھی کیا۔

آرمی چیف نے کہا کہ سخت تربیت ہی سپاہی کی پیشہ ورانہ ترقی کا بنیادی ستون ہے اور جدید جنگ کے چیلنجز سے نمٹنے کے لیے سخت سپاہیانہ تربیت پاک فوج کی نمایاں خصوصیت ہونی چاہیے۔

آئی ایس پی آر کے مطابق آرمی چیف کے اس دورے کا مقصد نہ صرف بہاولپور کور کی جنگی تیاریوں کا جائزہ لینا تھا بلکہ اس بات کو بھی یقینی بنانا تھا کہ سپاہیوں کی تربیت جدید جنگی تقاضوں کے مطابق ہو تاکہ وہ کسی بھی چیلنج کا مقابلہ کر سکیں۔