اسلام آباد: وزیر صحت مصطفی کمال اور ڈبلیو ایچ او کی ریجنل ڈائریکٹر ڈاکٹر حنان بلخے کے درمیان ٹیلی فونک رابطہ میں صحت کے شعبے میں تعاون کو مزید مستحکم کرنے پر اتفاق کیا گیا ہے۔

وفاقی وزیر صحت مصطفی کمال اور ڈبلیو ایچ او ایمرو ریجن کی ریجنل ڈائریکٹر ڈاکٹر حنان بلخے کے درمیان ٹیلی فونک رابطہ ہوا جس میں صحت کے شعبے میں تعاون کو مزید مستحکم کرنے پر اتفاق کیا گیا۔

ڈبلیو ایچ او کی ریجنل ڈائریکٹر نے ڈاکٹر مصطفی کمال کو وزارت صحت کا منصب سنبھالنے پر مبارکباد دی اور پاکستان میں صحت کے نظام کی بہتری کے لیے تعاون جاری رکھنے کی یقین دہانی کرائی۔

وزیر صحت نے ڈاکٹر حنان بلخے کو پاکستان کے دورے کی دعوت دی جو انہوں نے قبول کرلی۔ ان کے دورے کے دوران خصوصی طور پر پاکستان کو درپیش صحت کے چیلنجز اور شعبہ صحت کے اہداف پر تبادلہ خیال کیا جائے گا۔

مصطفی کمال نے گفتگو میں کہا کہ بیماریوں کی کوئی سرحد نہیں ہوتی اور پاکستان گلوبل ہیلتھ سیکیورٹی کے حوالے سے جدہ میں ڈبلیو ایچ او کے ساتھ مل کر گلوبل ہیلتھ اکیڈمی کے قیام کا خواہاں ہے۔

اس پر ڈبلیو ایچ او نے پاکستان کو مکمل تکنیکی معاونت فراہم کرنے کی یقین دہانی کرائی۔

وفاقی وزیر صحت نے مزید کہا کہ پاکستان میں ہیپاٹائٹس کے ایک کروڑ کیسز موجود ہیں اور وزیراعظم کے ویژن کے تحت ہیپاٹائٹس سی کے خاتمے کا قومی پروگرام ملک بھر میں شروع کیا جارہا ہے۔

انہون نے بتایا کہ گلگت بلتستان کے دو اضلاع میں ہیپاٹائٹس سی کے خاتمے کے پائلٹ پروجیکٹ کی کامیاب تکمیل کے بعد اسے ملک بھر میں توسیع دی جا رہی ہے۔

انہوں نے اس بات پر زور دیا کہ حکومت پولیو کے مکمل خاتمے کے لیے پرعزم ہے اور اپریل میں مؤثر پولیو مہم کا انعقاد کیا جائے گا۔

ڈبلیو ایچ او کی ریجنل ڈائریکٹر نے پاکستان کی پولیو کے خاتمے کی کوششوں کو سراہا اور یقین دلایا کہ ڈبلیو ایچ او پاکستان کے ساتھ پولیو سمیت دیگر بیماریوں کے خاتمے کے لیے مکمل تعاون جاری رکھے گا۔