پاکستان سپیس اینڈ اپرایٹموسفیئر ریسرچ کمیشن (سپارکو) نے سائنسی تجزیوں، فلکیاتی اور جدید مشاہداتی ڈیٹا کی بنیاد پر شوال 1446 ہجری کے ہلال کی رویت کے حوالے سے پیشگوئی کر دی۔

فلکیاتی ماڈلز کے مطابق شوال کا نیا چاند 29 مارچ 2025 کو پاکستان معیاری وقت کے مطابق 15:58 بجے تشکیل پائے گا۔

ترجمان سپارکو نے بتایا کہ ہلال کی رویت کا انحصار اہم عوامل جیسے چاند کی عمر، سورج سے زاویائی فاصلہ، غروبِ آفتاب کے وقت بلندی اور ماحولیاتی حالات پر ہوگا۔

ترجمان کا کہنا ہے کہ 30 مارچ 2025 (29 رمضان) کے لیے پاکستان میں سائنسی تجزیہ ہے، 29 رمضان بمطابق 30 مارچ غروبِ آفتاب کے وقت چاند کی عمر تقریباً 27 گھنٹے ہو گی۔

سپارکو کے ترجمان کے مطابق چاند اور سورج کا زاویائی فاصلہ تقریباً 16 ڈگری ہو گا اور غروبِ آفتاب کے وقت چاند کی بلندی تقریباً 14 ڈگری، روشنی 2 فیصد ہو گی۔

ترجمان نے کہا کہ ہلال انسانی آنکھ سے آسانی سے نظر آئے گا، سائنسی پیمانوں کو مدنظر رکھتے ہوئے 30 مارچ 2025 کو پاکستان میں چاند کے نظر آنے کا امکان نہایت روشن ہے۔

سپارکو کے ترجمان کے مطابق رمضان کے 29 دن مکمل ہونے کی توقع ہے اور عید الفطر 31 مارچ 2025 کو منائی جائے گی، عید الفطر کے موقع پر چاند کی رویت کا فیصلہ رویتِ ہلال کمیٹی کی ذمہ داری ہے۔

ترجمان نے مزید کہا کہ مرکزی رویتِ ہلال کمیٹی ملک بھر سے موصول ہونے والی گواہیوں کا جائزہ لے کر شوال 1446 ہجری کا باقاعدہ اعلان کرے گی، سائنسی ڈیٹا 30 مارچ 2025 کو ہلال کے نظر آنے کی مضبوط تائید کرتا ہے لیکن مرکزی رویت کمیٹی کا حتمی فیصلہ چشم دید گواہیوں اور مشاہدے کے وقت مقامی موسمی حالات پر منحصر ہوگا۔