نائب صدر پاکستان پیپلز پارٹی سینیٹر شیری رحمان نے عید الفطر کے موقع پر تمام اہل وطن کو مبارکباد پیش کی اور اس موقع پر غریب اور مستحق افراد کو اپنی خوشیوں میں شریک کرنے کی اپیل کی۔

انہوں نے کہا کہ عید کی خوشیوں میں آس پاس کے غریب افراد کو بھی شامل کریں اور اپنے گلیوں، محلوں اور شہروں کو کچرے سے پاک رکھیں۔

شیری رحمان نے عوامی اور سیاحتی مقامات پر پلاسٹک کی تھیلیوں اور بوتلوں کے استعمال سے گریز کرنے کی ضرورت پر زور دیا اور کہا کہ پلاسٹک کا استعمال ماحولیات پر منفی اثرات مرتب کرتا ہے، جس سے آلودگی میں اضافہ ہوتا ہے۔

انہوں نے کہا کہ صاف ماحول میں ہی خوشحال زندگی ممکن ہے، اور پانی ہماری زندگیوں کے لیے انتہائی اہم ہے۔

انہوں نے بدقسمتی سے پاکستان کو پانی کی شدید کمی کا سامنا ہونے کا ذکر کرتے ہوئے کہا کہ ہم سب کو مل کر پانی کے استعمال میں احتیاط برتنی ہوگی اور اسے محفوظ کرنے کے لیے اہم اقدامات اٹھانے ہوں گے۔

نائب صدر پیپلز پارٹی نے کہا کہ وطن عزیز کو بدترین دہشتگردی کا سامنا ہے، مگر بہادر قوم کے حوصلے پست نہیں ہوئے اور نہ ہی ہوں گے۔

انہوں نے آج کے دن ملک کے لیے قربانیاں دینے والے شہداء کو خراج تحسین پیش کرتے ہوئے کہا کہ پاکستانی قوم مشکل کی ہر گھڑی میں متحد رہنے کی صلاحیت رکھتی ہے۔

شیری رحمان نے دعا کی کہ اللہ تعالیٰ پاکستان کے تمام سکیورٹی اداروں کو ہر محاذ پر کامیابی عطا فرمائے۔ انہوں نے کہا کہ ہمیں عہد کرنا ہوگا کہ ملک و قوم کی ترقی اور خوشحالی کے لیے مل کر کام کرتے رہیں گے۔

انہوں نے عید کے موقع پر مقبوضہ کشمیر میں بھارتی ستم کے شکار کشمیریوں اور غزہ میں اسرائیلی افواج کے مظالم کا سامنا کرنے والے اپنے بھائیوں اور بہنوں کو بھی یاد رکھنے کی اپیل کی۔