حیدرآباد: وزیراطلاعات سندھ شرجیل میمن نے کہا ہے کہ عید کے موقع پر تمام پاکستانی اپنے اختلافات بھلادیں، ہمیں مل کر پاکستان کو مضبوط بنانا ہے اور درپیش چیلنجز کا مقابلہ کرنا ہے۔

شرجیل انعام میمن نے میڈیا سے گفتگو کرتے ہوئے کہا کہ دشمن ممالک ہمارے اندر تقسیم چاہتے ہیں، ہمیں چاہیے بھائی چارے سے ملک کو مضبوط کریں۔

انہوں نے کہا کہ دہشت گردی کے واقعات میں بےگناہوں کو بسوں سے اتار کر شہید کیا گیا، افواج، سیکیورٹی اداروں کے جوان وطن کیلئے قربانی دے رہے ہیں۔

وزیراطلاعات نے کہا کہ دشمن چاہتے ہیں پاکستان میں نفرتوں کی آگ بڑھائی جائے، دشمن ممالک ہم میں دراڑیں ڈالنا چاہتے ہیں، پاکستان کے دشمن چاہتے ہیں کہ بھائی سے بھائی لڑے۔

انکا کہنا تھا کہ سندھ حکومت نے ڈرائیونگ لائسنس کے حصول کوسخت کیا ہے، ڈمپریابس ڈرائیورکی غلطی ہے تو اسے گرفتار ہونا چاہیے، حادثات کےباعث ایک بھی قیمتی جان کانقصان نہیں ہوناچاہیے، ٹریفک حادثات پر سیاست نہایت ہی افسوسناک بات ہے، جن کی سیاست مرچکی تھی وہ سمجھتے ہیں کہ مردہ سیاست جاگ جائے گی۔

صوبائی وزیر نے کہا کہ تمام پاکستانیوں کو اختلافات بھلا کر ملک کیلئے کوششیں کرنی چاہئیں، سب کو مل کر چیلنجز سے مقابلہ کرنے کی ضرورت ہے۔

شرجیل انعام میمن نے مزید کہا کہ قائداعظم نے ہمیں اتحاد کا پیغام دیا، ماضی کی غلطیوں کو ختم کر کے ہمیں ایک ہونا پڑے گا، آج کے دن فلسطینیوں کو بھی یاد کیا جائے۔