چنیوٹ میں لاری اڈہ لالیاں پر بس اور مسافر ویگن کے درمیان ایک ہولناک تصادم کے نتیجے میں 7 افراد جاں بحق اور 10 سے زائد زخمی ہو گئے۔

ریسکیو ذرائع کے مطابق، پانچ افراد موقع پر ہی جاں بحق ہو گئے، جن کا تعلق مسافر ویگن سے تھا۔

حادثے میں زخمی ہونے والے 12 افراد کو فوری طور پر تحصیل ہیڈکوارٹر (ٹی ایچ کیو) اسپتال منتقل کیا گیا، جہاں زخموں کی تاب نہ لاتے ہوئے مزید دو افراد دم توڑ گئے۔

ایم ایس ڈاکٹر الطاف بھوانہ نے اسپتال میں ایمرجنسی نافذ کر دی ہے تاکہ زخمیوں کو فوری طبی امداد فراہم کی جا سکے۔

ابتدائی اطلاعات کے مطابق، بس میں نجی گارمنٹس فیکٹری کے ورکرز سوار تھے، جبکہ مسافر ویگن سرگودھا سے فیصل آباد جا رہی تھی۔

حادثے کے بعد ریسکیو ٹیمیں فوری طور پر موقع پر پہنچیں اور زخمیوں کو ہسپتال منتقل کیا۔ پولیس نے حادثے کی تحقیقات شروع کر دی ہیں اور مزید تفصیلات کی توقع ہے۔