اسلام آباد: حکومت پاکستان کی جانب سے غیر قانونی طور پر مقیم غیر ملکیوں اور افغان سٹیزن کارڈ ہولڈرز کے انخلا کا عمل جاری ہے جب کہ 31 مارچ کی ڈیڈلائن ختم ہونے میں صرف 10 دن باقی رہ گئے ہیں۔

حکومت پاکستان نے غیر قانونی طور پر مقیم غیر ملکیوں، خاص طور پر افغان سٹیزن کارڈ ہولڈرز کو ملک چھوڑنے کے لیے 31 مارچ کی حتمی تاریخ مقرر کی ہے۔

سرکاری اعداد و شمار کے مطابق، 21 مارچ تک 8,75,165 افغان باشندے پاکستان سے واپس جاچکے ہیں اور یہ سلسلہ مسلسل جاری ہے۔

حکام نے یقین دہانی کرائی ہے کہ انخلا کے دوران کسی سے بدسلوکی نہیں کی جائے گی اور اس عمل کو منصفانہ اور شفاف بنایا جائے گا۔

واپس جانے والوں کے لیے حکومتِ پاکستان نے خوراک اور صحت کی سہولیات کے مکمل انتظامات کر لیے ہیں تاکہ انخلا کا عمل انسانی بنیادوں پر مکمل ہوسکے۔

حکومت نے واضح کیا ہے کہ 31 مارچ کی مقررہ تاریخ کے بعد جو بھی غیر قانونی افراد ملک میں مقیم ہوں گے ان کے خلاف سخت قانونی کارروائی عمل میں لائی جائے گی۔