جعفر ایکسپریس پر ہونے والے دہشتگردانہ حملے میں بازیاب ہونے والے مسافروں نے پاک فوج اور فرنٹیئر کانسٹیبلری (ایف سی) کے جوانوں کی جرات و بہادری کی دل سے تعریف کی۔

مسافروں نے بتایا کہ ایف سی کے جوانوں نے نہ صرف ان کی فوری مدد کی بلکہ ان کا خیال بھی رکھا، اور ان کے جسمانی و نفسیاتی حالات میں بہتری لانے کے لیے تمام ضروری اقدامات کیے۔

ایک بازیاب مسافر نے کہا کہ ہم پنیر ریلوے سٹیشن سے مال گاڑی کے ذریعے مشک پہنچے ہیں۔ ایف سی کے جوانوں نے ہمارا بہت خیال رکھا، ہمارا روزہ بھی کھلوایا اور ہمیں کھانا بھی دیا۔

دوسرے بازیاب مسافر نے کہا کہ جعفر ایکسپریس سانحہ کے بعد ہمیں پاک آرمی اور ایف سی نے سبی پہنچایا، جہاں سے ہمیں پنجاب روانہ کیا جائے گا۔

جعفر ایکسپریس میں ہونے والے دہشتگردانہ حملے کے حوالے سے مسافروں نے بتایا کہ اچانک ایک بم دھماکا ہوا جس کے بعد فائرنگ کی آوازیں سنائی دینے لگیں۔

آٹھ نمبر ٹنل کے قریب کچھ دہشتگردوں نے حملہ کیا اور بم دھماکا کیا جس سے ٹریک کو بھی نقصان پہنچا۔

ایک مسافر نے بتایا کہ ایف سی نے فوری ردعمل دیا اور دہشتگردوں کی قید سے ڈیڑھ دو سو مسافروں کو بازیاب کرالیا۔

بازیاب مسافروں کا کہنا تھا کہ ایف سی کے جوانوں نے انتہائی پروفیشنل انداز میں کام کیا اور انہیں دہشتگردوں کی قید سے بچانے کے لئے جراتمندانہ کارروائیاں کیں۔

ان مسافروں نے پاک فوج اور ایف سی کے تمام اہلکاروں کا شکریہ ادا کیا اور ان کی جانب سے فراہم کردہ مدد اور حمایت کو سراہا۔