برطانوی ہائی کمشنر جین میریٹ نے وفاقی وزیر صحت مصطفی کمال سے ملاقات کی اور انہیں وزارت کا عہدہ سنبھالنے پر مبارکباد اور نیک خواہشات کا اظہار کیا۔

وزارت صحت کے ترجمان کے مطابق، برطانوی ہائی کمشنر نے وزیر صحت کو ان کے بطور میئر کراچی کیے گئے کام کو سراہتے ہوئے کہا کہ ان کی قیادت ایک مثالی نمونہ ہے جسے عالمی سطح پر قدر کی نگاہ سے دیکھا جاتا ہے۔

ہائی کمشنر نے کہا کہ انہیں امید ہے کہ مصطفی کمال کے وسیع تجربے اور صلاحیتوں سے پاکستان کے صحت کے شعبے میں نمایاں بہتری آئے گی۔

انہوں نے مزید کہا کہ برطانیہ صحت کے شعبے میں جاری تمام منصوبوں کے حوالے سے پاکستان کی حکومت کی بھرپور حمایت کرتا ہے اور پاکستانی قوم کی جانب سے برطانوی حکومت کا شکریہ ادا کرتے ہیں۔

وفاقی وزیر صحت مصطفی کمال نے اس موقع پر یقین دہانی کرائی کہ صحت کے شعبے میں جاری منصوبوں کو مزید مستحکم کیا جائے گا۔

انہوں نے کہا کہ وزیر اعظم شہباز شریف کی قیادت میں حکومت صحت کے شعبے کی بہتری کے لیے متحرک ہے اور ایک سال کے اندر کیے گئے اقدامات کے مثبت اثرات عوام تک پہنچنا شروع ہو گئے ہیں۔

وزیر صحت نے اپنی جانب سے مستقبل کے صحت کے منصوبوں کا بھی ذکر کیا اور کہا کہ ان کا خواب ٹیلی میڈیسن کو پاکستان میں کامیاب بنانا ہے، تاکہ جدید ٹیکنالوجی کا استعمال کرتے ہوئے صحت کی سہولتیں عوام تک پہنچائی جا سکیں۔

انہوں نے مزید بتایا کہ پاکستان میں ہیپاٹائیٹس سی کے خاتمے کے لیے پورے ملک میں ایک بڑا پروگرام شروع کیا گیا ہے، جس کا پائلٹ منصوبہ گلگت بلتستان میں کامیابی سے مکمل کیا گیا ہے۔

اس پروگرام کا مقصد پاکستان میں ایک کروڑ 10 لاکھ افراد کو صحت کی سہولتیں فراہم کرنا ہے۔ وزیر صحت نے کہا کہ نرسنگ کے شعبے میں بھی عالمی معیار کے مطابق بہتری لائی جا رہی ہے، کیونکہ پاکستان میں نرسز کی کمی ہے اور دنیا بھر میں نرسنگ کی اہمیت اور ضرورت بڑھتی جا رہی ہے۔

برطانوی ہائی کمشنر نے وزیر صحت کی تائید کی اور ہر ممکن تعاون فراہم کرنے کا یقین دلایا، تاکہ پاکستان کے صحت کے شعبے میں مثبت تبدیلیاں لائی جا سکیں۔