صدر مملکت آصف علی زرداری اور وزیر اعظم شہباز شریف نے رمضان المبارک 1446ھ کے آغاز پر اپنے پیغامات میں پاکستانی قوم اور امت مسلمہ کو رمضان کی بابرکت ماہ کی مبارکباد دی ہے۔

صدر مملکت آصف علی زرداری کا پیغام

صدر مملکت آصف علی زرداری نے اپنے پیغام میں کہا کہ میں پوری پاکستانی قوم اور امت مسلمہ کو رمضان المبارک کے بابرکت مہینے کے آغاز پر مبارکباد پیش کرتا ہوں۔

رمضان رحمت، مغفرت اور جہنم سے نجات کا مہینہ ہے۔ یہ مہینہ تزکیہ نفس، صبر، استقامت، ہمدردی، مساوات اور اتحاد کا درس دیتا ہے۔ رمضان کا تقویٰ، اخلاص اور قربِ الٰہی حاصل کرنے کا بہترین موقع ہے۔

صدر مملکت نے مزید کہا کہ رمضان میں ہمیں غرباء و مساکین کی حاجت روائی کرنی چاہیے اور معاشرے میں ایثار و قربانی کے جذبے کو فروغ دینا چاہیے۔

رمضان مسلمانوں کے لیے انفرادی اور اجتماعی سطح پر اصلاح کا ماحول پیدا کرتا ہے، جس سے ہماری زندگیوں کو از سر نو شروع کرنے کا بہترین موقع ملتا ہے۔ رمضان ہمیں ضرورت مندوں اور محروم طبقات کی تکلیف کا احساس بھی دلاتا ہے۔

صدر آصف علی زرداری نے پاکستانی قوم سے اپیل کی کہ وہ اس مبارک مہینے میں خیرات و صدقات میں بڑھ چڑھ کر حصہ لیں اور ضرورت مند افراد کا خاص خیال رکھیں۔

انہوں نے دعا کی کہ اللہ تعالیٰ ہمیں رمضان المبارک کی برکتوں سے مستفید ہونے، صبر و تقویٰ اختیار کرنے اور امتِ مسلمہ کی فلاح و بہبود کے لیے اپنا کردار ادا کرنے کی توفیق دے۔

وزیر اعظم شہباز شریف کا پیغام

وزیر اعظم پاکستان شہباز شریف نے اپنے پیغام میں اللہ کا شکر ادا کرتے ہوئے کہا کہ اللہ تعالیٰ کا شکر ہے کہ ایک بار پھر ہمیں رمضان المبارک کی سعادت نصیب ہو رہی ہے۔

یہ مہینہ رحمتوں، برکتوں اور مغفرت کا ہے، جس میں اللہ ہمیں اپنی قربت عطا فرماتے ہیں۔ رمضان کا اصل پیغام صبر، شکر، ہمدردی اور اخوت و ایثار ہے۔

انہوں نے مزید کہا کہ یہ وہ مہینہ ہے جو ہمیں دوسروں کے دکھ درد کا احساس دلاتا ہے۔ ہمیں اپنے آس پاس غریبوں اور محتاجوں کو یاد رکھنا چاہیے، اور فلسطینی اور کشمیری بھائیوں اور بہنوں کو بھی یاد رکھنا ہے جو ظلم و جبر کا شکار ہیں۔ ہمیں متحد ہو کر اس ظلم کے خلاف آواز اٹھانی ہے۔

وزیر اعظم شہباز شریف نے کہا کہ یہ وقت ہے کہ ہم امتِ مسلمہ کے اتحاد کو مضبوط کریں اور باہمی تعاون و اخوت کو فروغ دیں۔

ہم دعاگو ہیں کہ اس مہینے کی برکت سے اللہ پاکستان کو استحکام نصیب فرمائے اور ہمیں توفیق دے کہ ہم عوام کی خدمت کریں اور پاکستان کو اقوام دنیا میں اس کا جائز مقام دلائیں۔

وزیر اعظم نے قوم سے اپیل کی کہ اس بابرکت مہینے میں ہم سب زیادہ سے زیادہ عبادات کریں، غریبوں اور محتاجوں کی مدد کریں اور اپنی دعاؤں میں فلسطین، بھارتی غیر قانونی مقبوضہ جموں و کشمیر کے مظلوم مسلمانوں اور پوری مسلم اُمہ کو یاد رکھیں۔

انہوں نے دعا کی کہ اللہ تعالیٰ رمضان کی برکتوں سے ہمیں نوازے اور ہمیں آپس میں محبت اور بھائی چارے کے رشتے میں جوڑ دے۔