روس میں ایک 23 سالہ نوجوان نے ایسا کارنامہ سرانجام دیا ہے جس پر بیشتر افراد حیران رہ گئے ہیں۔

پاؤل اسٹیفنیکو نامی اس نوجوان نے صرف 2 سال کی ملازمت کے بعد مکمل پنشن کے ساتھ ریٹائرمنٹ لے لی، جو کہ ایک غیر معمولی اور نایاب صورتحال ہے۔

پاؤل نے اپنے کیریئر کا آغاز صرف 16 سال کی عمر میں روسی وزارت داخلہ امور کے تعلیمی ادارے میں داخلہ لے کر کیا تھا۔

 پانچ سال کی سخت تربیت کے بعد، اسے وزارت داخلہ میں ملازمت ملی، تاہم صرف دو سال تک ملازمت کے بعد اس نے ریٹائرمنٹ لے لی۔

اس حیرت انگیز ریٹائرمنٹ کے پیچھے روسی قانون کی ایک خصوصی شق کارگر ثابت ہوئی، جس کے تحت مارشل لا کے دوران ملازمت کرنے والے افراد کی سروس میں ہر ماہ کے اختتام پر تین ماہ کا اضافہ کیا جاتا ہے۔

اس شق کا فائدہ اٹھاتے ہوئے پاؤل اسٹیفنیکو نے اپنی سروس کی مدت کو تیز رفتار سے مکمل کیا۔

پاؤل نے 28 نومبر 2023 کو ریٹائرمنٹ کی درخواست دی، جو روسی قانون کے مطابق منظور کر لی گئی اور اسے مکمل پنشن دے دی گئی۔

اس غیر معمولی کامیابی کو انٹرنیشنل ریکارڈ رجسٹریشن ایجنسی نے نوٹس لیا اور اس کی تصدیق روس کے سرکاری ریکارڈ سے کی۔

پاؤل اسٹیفنیکو کی اس کامیابی کے بعد وہ مالی تحفظ اور مکمل آزادی حاصل کر چکا ہے، وہ بھی اس عمر میں جب بیشتر افراد اپنی پہلی ملازمت شروع کرنے کے بارے میں سوچ رہے ہوتے ہیں۔