راولپنڈی: زمبابوے پاکستان سے 12 سپر مشاق طیارے خریدے گا جس سے زمبابوے ایئرفورس کی آپریشنل تربیتی صلاحیتوں میں اضافہ ہوگا۔

پاک فوج کے شعبہ تعلقات عامہ (آئی ایس پی آر) کے مطابق زمبابوے ایئرفورس کے سربراہ ایئر مارشل کی ایئر ہیڈکوارٹر اسلام آباد میں چیف آف دی ایئر اسٹاف، ایئر چیف مارشل ظہیر احمد بابر سدھو سے ملاقات ہوئی۔

آئی ایس پی آر نے بتایا کہ سربراہ ایئر مارشل جان جیکب کی آمد پر پاک فضائیہ کے چاق و چوبند دستے نے گارڈ آف آنر پیش کیا جب کہ ملاقات میں تربیت، ہیومن ریسورس کی اپ گریڈیشن اور تکنیکی معاونت پر تبادلہ خیال کیا گیا۔

ترجمان پاک فوج کا کہنا ہے کہ زمبابوے نے پی اے ایف اکیڈمی اصغر خان میں کیڈٹس کی تربیت کی خواہش کا اظہار کیا جب کہ زمبابوے نے پی اے ایف کے پائلٹس، انجینئرز اور ٹیکنیکل عملے کی تعیناتی کی بھی درخواست کی۔

آئی ایس پی آر کا کہنا تھا کہ دونوں ممالک کے درمیان 12 سپر مشاق طیاروں کی فراہمی پر بھی بات چیت ہوئی جب کہ زمبابوے پاکستان سے 12 سپر مشاق طیارے خریدے گا جس سے زمبابوے ایئرفورس کی آپریشنل تربیتی صلاحیتوں میں اضافہ ہوگا۔

پاک فوج کے شعبہ تعلقات عامہ نے یہ بھی بتایا کہ ایئرچیف نے زمبابوے ایئر فورس میں انسانی وسائل، مینٹیننس کے طریقہء کار اور آپریشنل تربیت میں بہتری کے حصول کے لیئے ہر ممکن مدد کی فراہمی کے غیر متزلزل عزم کا اعادہ کیا۔

ترجمان نے کہا چیف آف ایئر اسٹاف  نے ایک بہترین اور لازوال اتحادی کی حیثیت سے زمبابوے کے ساتھ دو طرفہ تاریخی شراکت داری کو بھی اجاگر کیا۔

آئی ایس پی آر نے مزید بتایا کہ اس موقع پر ایئر چیف کا کہنا تھا کہ پاک زمبابوے عسکری تعلقات علاقائی امن اور سلامتی سے متعلق تمام اہم امور میں مکمل ہم آہنگی پر مبنی ہیں۔