صدر مملکت آصف علی زرداری کی طبیعت سے متعلق ڈاکٹر عاصم حسین کا بیان سامنے آگیا۔

صدر آصف علی زرداری کی صحت سے متعلق ڈاکٹر عاصم نے میڈیا سے گفتگو کرتے ہوئے کہا کہ میں اپنا فرض سمجھتا ہوں کہ آپ سب کوبتاؤں اصل میں ہوا کیا تھا۔

ڈاکٹرعاصم حسین نے کہا کہ سوشل میڈیا اور بھارتی چینل بے بنیاد من گھڑت خبریں چلا رہے ہیں، عید کی نماز میں صدر آصف زرداری کی طبیعت خراب ہوئی تھی۔

انہوں نے بتایا کہ صدر زرداری کی طبیعت بہتر ہے، پریشانی کی بات نہیں۔ نواب شاہ میں صحت کی سہولت نہیں ہیں جس کے باعث پیر کی رات صدر مملکت کو نواب شاہ سے کراچی لائے۔

ڈاکٹرعاصم کہتے ہیں کہ میں رات کو نوابشاہ پہنچا تو اندازہ ہوگیا کہ کراچی لانا پڑے گا۔ پیر کی رات صدر زرداری کو کراچی لے آئے اور ٹیسٹ شروع کیے جب کہ ٹیسٹ سے ثابت ہوا کہ صدر زرداری کو کورونا ہوگیا ہے۔

ڈاکٹرعاصم حسین نے مزید بتایا کہ ہم نے کورونا کا علاج شروع کیا، کچھ ایسی دوائیاں آگئیں جو پاکستان میں نہیں ملتیں انہیں باہر سے منگوایا گیا جب کہ آصف زرداری کل یا پرسوں اسپتال سے ڈسچارج ہوجائیں گے۔