صدر مملکت صدر آصف علی زرداری نے کہا کہ پوری قوم سلامتی کمیٹی کے فیصلوں اور اقدامات کے ساتھ کھڑی ہے۔

وفاقی وزیرداخلہ محسن نقوی نے کراچی میں  صدر  مملکت آصف علی زرداری سے اہم ملاقات کی۔

ملاقات میں محسن نقوی نے پہلگام واقعہ کے بعد بھارت کے  غیر ذمہ دارانہ اقدامات  کے تناظر میں  تفصیلی بریفنگ دیتے ہوئے بھارت کے غیر ذمہ دارانہ اقدامات کے بعد قومی سلامتی کمیٹی کی جانب سے جوابی اقدامات سے صدر آصف زرداری کو آگاہ کیا۔

صدر آصف علی زرداری نے قومی سلامتی کمیٹی کے بروقت، فوری اور دور اندیش قومی اقدامات اور فیصلوں کو سراہتے ہوئے کہا  کہ قومی سلامتی کمیٹی کے تمام فیصلے قوم کے دل کی آواز ہیں۔

صدر مملکت نے یہ بھی کہا کہ قومی سلامتی کمیٹی نے پاکستانی قوم کی امنگوں کی ترجمانی کی ہے، بھارت کے  بے بنیاد الزامات اور غیر منطقی اقدامات کا کوئی جواز نہیں بنتا۔

اس موقع پر وفاقی وزیرداخلہ محسن نقوی نے کہا کہ دشمن کسی غلط فہمی میں نہ رہے، پاکستان کا دفاع الْحَمْدُ لِلَّهِ ناقابل تسخیر ہے۔