شہر قائد کی سڑکیں اب موت کا میدان بنتی جا رہی ہیں، جہاں صرف رواں سال کے ابتدائی 101 دنوں میں ٹریفک حادثات نے 262 قیمتی جانیں نگل لیں۔

ریسکیو ذرائع کے مطابق، حادثات میں جاں بحق ہونے والوں میں 200 مرد، 26 خواتین، 28 بچے اور 8 بچیاں شامل ہیں۔

اعداد و شمار کے مطابق، ان اموات میں سب سے بڑا کردار ہیوی گاڑیوں کا رہا، جو شہری علاقوں میں بھی بے خوف دوڑتی نظر آتی ہیں۔

ریسکیو ذرائع کے مطابق ڈمپرز نے 17 شہریوں کی جان لے لی، ٹرالرز کی زد میں آ کر 32 افراد جان کی بازی ہار گئے۔

واٹر ٹینکرز نے بھی 17 افراد کی زندگی کا چراغ گل کر دیا جبکہ مزدا گاڑیوں کے نیچے آ کر 6 افراد جان سے ہاتھ دھو بیٹھے۔

 تیز رفتاری اور غفلت کے باعث بسوں کی ٹکر سے 8 افراد جان بحق ہوئے جبکہ مجموعی طور پر ہیوی گاڑیوں سے متاثرہ افراد کی تعداد 80 ہو چکی ہے۔