وفاقی وزیر خزانہ محمد اورنگزیب نے کہا کہ پاکستان میں امریکی فرموں کی سرمایہ کاری کو خوش آمدید کہیں گے۔

وفاقی وزیر خزانہ محمد اورنگزیب نے عالمی جریدے بلوم برگ کو انٹرویو دیتے ہوئے کہا کہ ہم امریکہ کے ساتھ بڑے پیمانے پر معاشی روابط بڑھانا چاہتے ہیں،  ہم تعمیری انداز میں آگے بڑھیں گے۔

محمد اورنگزیب نے کہا کہ جلد ہی ایک سرکاری وفد امریکہ جائے گا، پاکستان امریکہ سے مزید کپاس اور سویا بین خریدنے کا خواہش مند ہے، جبکہ غیر ٹیرف رکاوٹوں کو ختم کرنے پر بھی بات چیت جاری ہے تاکہ امریکی مصنوعات کے لیے پاکستانی منڈیوں کے دروازے کھل سکیں۔

وزیر خزانہ کا کہنا ہے کہ امریکی مصنوعات پر پاکستان میں کوئی غیر ضروری جانچ پڑتال یا رکاوٹیں ہیں تو اس کا جائزہ لینے کو تیار ہیں، خصوصی طور پر کان کنی اور معدنیات کے نئے شعبوں میں امریکی سرمایہ کاری کی حوصلہ افزائی کریں گے۔

محمد اورنگزیب نے کہا کہ پاکستان معیشت کو پائیدار ترقی کی راہ پر ڈالنے کا خواہشمند ہے، ترقی کے سفر میں سرمائے کے حصول کے لیے عالمی مالیاتی منڈیوں سے رجوع کریں گے۔

 وزیر خزانہ نے مزید یہ بھی کہا کہ پاکستان کے معاشی اتار چڑھاؤ کے چکر سے ہمارا نصب العین ہے، حکومت پاکستان کو مستحکم ترقی کے سفر پر گامزن کرنے کے لیے پرعزم ہے۔